უკრაინის პრეზიდენტმა, ვოლოდიმირ ზელენსკიმ რუსეთს ტერორისული სახელმწიფო უწოდა ხარკოვზე თავდასხმის გამო. მისი თქმით, ეს დაუფარავი ტერირორია, რომელსაც არავინ დაივიწყებს და აპატიებს.

"ხარკოვი. თავდასხმა რაკეტით ევროპის უდიდეს მოედანზე. თავისუფლების მოედანზე. აი, ასეთი დილა აქვს უკრაინელ ხალხს.

ხარკოვის ცენტრალურ მოედანზე რაკეტა არის გულწრფელი, დაუფარავი ტერორი. ამის შემდეგ რუსეთი ტერორისტული სახელმწიფოა. არავინ აპატიებს. არავინ დაივიწყებს", — განაცხადა მან ვიდეომიმართვაში.

საოკუპაციო ძალებმა ხარკოვში თავისუფლების მოედნისკენ რაკეტები ისროლეს და ადმინისტრაციული შენობა დაბომბეს. უკრაინის საგანგებო სიტუაციების სამსახურის წარმომადგენლის თქმით, დაშავდა 20-მდე ადამიანი და ნანგრევების ქვეშ ადამიანებს ეძებენ.

მერის განცხადებით, დაბომბვას მსხვერპლი მოყვა და არიან დაჭრილები. მისივე თქმით, საქალაქო სამსახურები აგრძელებენ მუშაობას და ცდილობენ აღადგინონ ელექტროენერგიის და წყლის მიწოდება, დაარიგონ პროდუქტები იმის მიუხედავად, რომ მანქანებს ცეცხლს უხსნიან.

"ჩვენ ვაგრძელებთ. ჩვენ ვმუშაობთ, ჩვენ ცოცხლები ვართ, ჩვენ ვუძლებთ. ხარკოვი გაიმარჯვებს, ჩვენ ერთად ვართ", — ამბობს ის.

ფოტო: ДСНС України