საქართველოს კომუნიკაციების კომისიის გადაწყვეტილებით შპს იბერია TV რადიომაუწყებლის ლიცენზიის მფლობელი ვერ გახდა. მოსამზადებელ სხდომაზე კომისიამ აღმოაჩინა, რომ კომპანიამ დოკუმენტები არასრულად წარადგინა და არც, მოთხოვნის შესაბამისად, სამაუწყებლო კონცეფცია შეუდგენია. კომისიამ გადაწყვეტილების შესახებ ინფორმაცია 19 აპრილს გაავრცელა.

იგივე პრობლემა ჰქონდა კიდევ ერთ კომპანიას შპს სუპერ-ტვ-ს. კომუნიკაციების კომისიამ კონკურსი ამ კომპანიების მოთხოვნის საფუძველზე 2 მარტს გამოაცხადა. თუმცა, დარღვევები დისკვალიფიკაციის საფუძვლად მიიჩნია.

ეს პირველი შემთხვევა იყო, როცა კომუნიკაციების კომისიამ ეროვნულ დონეზე კერძო რადიომაუწყებლობის უზრუნველსაყოფად კონკურსი გამოაცხადა. ეროვნული მაუწყებლობის ლიცენზიის მიღების შემთხვევაში გამარჯვებული კომპანია ვალდებული იყო მაუწყებლობით საქართველოს მოსახლეობის 90 პროცენტი დაეფარა. ლიცენზიის საფასური 68 162 ლარი იყო.