ტელეკომპანია რუსთავი 2-ის ინფორმაციით, ციანიდის საქმეზე დაკავებული დეკანოზის, გიორგი მამალაძის ადვოკატის მეშვეობით, მათ კითხვებს ბრალდებულმა წერილობით უპასუხა.

რუსთავი 2-ის ცნობით, დეკანოზის გამოგზვნილ წერილში ნათქვამია, რომ მას ციანიდი არ შეუძენია და არც ბარგში ჰქონია, არამედ, მისივე აზრით, ნივთიერება ჩაუდეს: "ისიც ვიცი, ვინც ჩადო. საათები მოანდომეს ამ სიყალბეს. ეს პროკურატურას არ გაუკეთებია".

წერილში ასევე წერია, რომ პროკურატურამ კარგად იცის, თუ ვინ სთხოვა ნივთიერების შეძენა დეკანოზს და რისთვის: "ეს იყო ბევრი მხარის მიერ დაგებული მახე".

წერილში საუბარია იმაზეც, რომ თავდაპირველად, პროკურატურის ბრალდებაში მაღალი იერარქიის სასულიერო პირის მკვლელობის მომზადებაზე იყო საუბარი, მოგვიანებით კი პატრიარქის მდივან-რეფერენტის, შორენა თეთრუაშვილის სახელი გამოიკვეთა.

ტელეკომპანიის ცნობით, დეკანოზი წერს, რომ პროკურატურაში ცოტა დაიბნენ, რადგან არ იცოდნენ, რომელი ვერსია იყო მათთვის ხელსაყრელი: "მტკიცებულებებიც ძალიან მყიფე ჰქონდათ და გადაწყვიტეს, ბუნდოვნად დაეტოვებინათ თუ ვისი მკვლელობა იგეგმებოდა".

გიორგი მამალაძე მიმდინარე წლის თებერვალში, თბილისის საერთაშორისო აეროპორტში იმ დროს დააკავეს, როცა ის ბერლინში მიემგზავრებოდა. პროკურატურის მტკიცებით, ის გერმანიაში გეგმავდა ციანიდით მოეწამლა პატრიარქის მდივან-რეფერენტი, შორენა თეთრუაშვილი.

ციანიდის საქმე - მოკლედ