მოსკოვის სასამართლომ სანქტ-პეტერბურგის მეტროს ტერაქტის ორგანიზებაში ეჭვმიტანილ აბრორა აზიმოვას პატიმრობა შეუფარდა.

რუსული ტელეარხის, დოჟდის ცნობით, აზიმოვმა სასამართლოში განაცხადა, რომ "ვერ გააცნობიერა, რომ აფეთქების მომზადებაში იღებდა მონაწილეობას" და მხოლოდ "დავალებებს ასრულებდა". ამასთან, ვის მითითებებს ასრულებდა და კონკრეტულად რა გააკეთა, ამის შესახებ არც აზიმოვმა და არც გამომძიებელმა არ ისაუბრეს. დაპატიმრების წინააღმდეგ აზიმოვს პრეტენზია არ გამოუთქვამს, თუმცა ამტკიცებს, რომ დანაშაულში მისი თანამონაწილეობა ჯერ დამტკიცებული არ არის და ბრალსაც ნაწილობრივ აღიარებს.

საქმის მასალების თანახმად, აბრორა აზიმოვა ყირგიზეთში დაიბადა, თუმცა რუსეთშია რეგისტრირებული და პოდმოსკოვიეში ცხოვრობდა. ბრალდებულის საცხოვრებელ სახლში მაკაროვის ტიპის იარაღი, მობილური ტელეფონი და რამდენიმე სიმბარათი იპოვეს.

ბრალდებული ოფიციალურად არ მუშაობდა, ამასთან, დაქორწინებულია და მცირეწლოვანი შვილიც ჰყავს.

აზიმოვი პეტერბურგის ტერაქტის საქმის მეცხრე მონაწილეა. მანამდე რუსეთის სამართალდამცავებმა რვა ადამიანი დააკავეს.

სანქტ-პეტერბურგის მეტროში ტერაქტი სამ აპრილს მოხდა. აფეთქების შედეგად 15 ადამიანი დაიღუპა, მათ შორის, ტერაქტის სავარაუდო შემსრულებელი აკბარჟონ ჯალილოვი.