შინაგან საქმეთა სამინისტროს ინიციატივით, იარაღის უკანონო შეძენა-შენახვა-ტარებაზე სანქციები გამკაცრდება. ინიციატივა დღეს, 18 აპრილის იურიდიულ საკითხთა კომიტეტის სხდომაზე განიხილეს და მას პირველი მოსმენით დაუჭირეს მხარი. კანონპროექტის შესახებ მომხსენებელი იყო შინაგან საქმეთა მინისტრის მოადგილე, შალვა ხუციშვილი.

კანონპროექტის ამჟამინდელი ვერსიის თანახმად, ცვლილება შედის სისხლის სამართლის კოდექსის 236-ე მუხლში, სადაც სანადირო ცეცხლსასროლი იარაღის ან სპორტული ცეცხლსასროლი იარაღის ან/და ასეთი იარაღის შესაბამისი საბრძოლო მასალის მართლსაწინააღმდეგო შეძენა ან შენახვა, ჩადენილი არაერთგზის, – დაისჯება თავისუფლების აღკვეთით ვადით ხუთ წლამდე. მოქმედი რედაქციით აღნიშნული დანაშაული ოთხ წლამდე ისჯებოდა.

ასევე, ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა ან შენახვა, – ისჯება თავისუფლების აღკვეთით ვადით სამიდან ექვს წლამდე. დღეის მდგომარეობით, იგი ისჯებოდა ოთხ წლამდე.

ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო ტარება, – დაისჯება თავისუფლების აღკვეთით ვადით ოთხიდან შვიდ წლამდე, აქამდე იგი ისჯებოდა ოთხიდან ექვს წლამდე.

იარაღის დამზადება, გადაზიდვა, გადაგზავნა ან გასაღება ხუთიდან რვა წლამდე დაისჯება, დღევანდელი რედაქციით, აღნიშნული დანაშაული ისჯებოდა ექვსიდან რვა წლამდე, ხოლო, წინასწარი შეთანხმებით ჯგუფის მიერ ან არაერთგზის ჩადენილი, დაისჯება ექვსიდან ათ წლამდე, ნაცვლად რვიდან თერთმეტ წლამდე.

პროექტის განმარტებით ბარათში აღნიშნულია, რომ ცვლილების შემდეგ, ერთმანეთისაგან გაიმიჯნება სხვადასხვა კატეგორიის ცეცხლსასროლი იარაღისა და მისი შესაბამისი საბრძოლო მასალის შეძენა/შენახვა.