თბილისის მერის, კახა კალაძის განცხადებით, პოლიტიკასა და სპორტს ერთმანეთთან კავშირი არ აქვს და ისინი გამიჯნული უნდა იყოს. ასე ეხმიანება ის რუსეთ-საქართველოს მატჩზე დაგეგმილ უკრაინის მხარდამჭერ აქტივობებს.

"ყოველთვის ვამბობდი, რომ სპორტი პოლიტიკასთან არანაირ კავშირში არაა და ყოველთვის, რა თქმა უნდა, უნდა იყოს გამიჯნული. არაერთი შეხვედრა გამართულა რაგბში რუსეთის ნაკრებთან, სხვათაშორის, ყოველთვის წარმატებით გამოდიოდა საქართველოს ნაკრები. დარწმუნებული ვარ, ახლაც წარმატებას მიაღწევენ, და რა თქმა უნდა, ყველაფერი უნდა გაკეთდეს იმისთვის, რომ სპორტი და პოლიტიკა გაიმიჯნოს", — განაცხადა მან.

კითხვაზე, მივიდოდა თუ არა თვითონ უკრაინის დროშით არენაზე და რა არის ცუდი იმაში, რომ მსგავსი ფორმით გამოუცხადონ ქვეყანას სოლიდარობა, კალაძე ამბობს, რომ ნებისმიერ ადამიანს მხარდაჭერის გამოხატვა ნებისმიერი ფორმით შეუძლია, მთავარია ეს "კანონის ფარგლებში" იყოს.

რუსეთ-საქართველოს მატჩი 27 თებერვალს, 18 საათზე გაიმართება. ევროპული საქართველოს განცხადებით, მოედანზე რუსეთის ჰიმნის პარალელურად უკრაინისა და საქართველოს დროშებს გაშლიან. მათი თქმით, იმ ფონზე, როდესაც ადგილობრივი და საერთაშორისო მედიების ყურადღება ამ მატჩზე იქნება მიპყრობილი, ეს ქვეყნიდან მკაფიო სიგნალი იქნება. პარტიაში ამბობენ, რომ თამაშის დაწყებამდე გულშემატკივრებისთვის დროშებს დაარიგებენ.

მატჩზე საქართველოსა და უკრაინის დროშების გაშლას აპირებს მოძრაობა სირცხვილიაც.