როგორც ჩინეთის საინფორმაციო სამსახური იუწყება, ქიმიის ასოცირებული პროფესორი, გვარად ჟენი 193 კილოგრამი მეთილონის დამზადებისა და საზღვარგარეთ გასაღებისთვისაა დაკავებული.

მან და მისმა პარტნიორმა $4 მილიონის ღირებულების ნარკოტიკის გასაღება შეძლეს.

პროფესორმა ნარკოტიკების დამზადება, 2014 წელს, ავსტრალიაში ვიზიტის დროს, გადაწყვიტა, როდესაც ნახა, რომ იქ აღნიშნულ ნივთიერებაზე დიდი მოთხოვნა იყო. ჟენი მეთილონს აშშ-ში, ბრიტანეთში, კანადასა და ავსტრალიაში ყიდდა.

მეთილონი ნივთიერებაა, რომელიც MDMA-ს დამზადებისთვის გამოიყენება.

ჟენი გამოგონილი სახელითა და გვარით, ფოსტის საშუალებით აგზავნიდა ნარკოტიკს, ხოლო თანხას ბიტკოინის საშუალებით იღებდა.

ჩინეთის სასამართლომ მას სამუდამო პატიმრობა მიუსაჯა.

აღსანიშნავია, რომ ჩინეთში ადრეც დაუკავებიათ ქიმიის პროფესორი, რომელიც ცნობილი სერიალის Breaking Bad-ის პერსონაჟის, ვოლტერ ვაითის მსგავსად, ნარკოტიკებს ამზადებდა. 2015 წელს დააპატიმრეს პროფესორი ზიანი, რომელიც მეთკატინონს ამზადებდა, ხოლო მის რეცეპტს "კატა" ერქვა.