ვლადიმერ პუტინის პრესსპიკერის, დმიტრი პესკოვის განცხადებით, მინსკის შეთანხმების საკითხი დღის წესრიგში აღარ დგას. მისივე თქმით, ახლა პრიორიტეტი რუსეთის "უსაფრთხოების გარანტიებია". რაც შეეხება ნორმანდიული ოთხეულის საგანგებო სამიტის გამართვის ალბათობას, პესკოვის თქმით, ეს დამოკიდებული იქნება დღის წესრიგში არსებულ კონკრეტულ წინადადებებზე.

აღსანიშნავია, რომ რუსეთ-უკრაინის მოლაპარაკებებში ჩართული მსოფლიო ლიდერები, მათ შორის, უკრაინის პრეზიდენტი ემანუელ მაკრონი იმედებს სწორედ მინსკის შეთანხმებასა და ნორმანდიის ფორმატზე ამყარებდნენ.

რუსეთის პრეზიდენტმა, ვლადიმერ პუტინმა უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარა. პუტინმა ეს გადწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჯღერა. მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.

პუტინის გადწყვეტილება მინსკის შეთანხმების უხეში დარღვევაა, რასაც უკვე გამოეხმაურენ მსოფლიო ლიდერები. ეს ქმედება დაგმო საქართველომაც.

აღიარების შემდეგ პუტინმა უკრაინის ტერიტორიაზე ჯარები გაგზავნა, მოტივად კი ისევ "სამშვიდობო მისია" დაასახელა. პუტინი ბრძანებაში ამტკიცებს, თითქოს უკრაინის ორი რეგიონის "დამოუკიდებლობა" კონფლიქტის მშვიდობიანი რეგულირებისა და მინსკის შეთანხმების გათვალისწინებით აღიარა.

დოკუმენტში ასევე ვკითხულობთ, რომ რუსეთს საგარეო საქმეთა სამინისტორს დაევალა, დონეცკისა და ლუგანსკის "მთავრობებთან" მოამზადოს მეგობრობის და ორმხრივი ურთიერთობების შეთანხმება. პუტინის ბრძანების მიხედვით, დონეცკისა და ლუგანსკის "მმართველების" მიმართვის საფუძველზე, შეთანხმების დადებამდე "სამშვიდობო მისიით" გაგაზავნიან ჯარებს.