ჟენევაში გაეროში ევროკავშირის დელეგაციის ელჩმა და მუდმივი წარმომადგენლის მოადგილემ, მიკელე ჩერვონე დ'ურსომ, გაეროს ადამიანის უფლებათა საბჭოს 63-ე სესიაზე საქართველოზე ისაუბრა.

მისი თქმით, ევროკავშირი საქართველოს მოუწოდებს, გააუქმოს ბოლო დროს მიღებული საკანონმდებლო ცვლილებები. ამასთანავე, ბრიუსელი ხაზს უსვამს მართლმსაჯულების პოლიტიკური მიზნებისთვის გამოყენებისა და თვითნებური დაკავებების აღკვეთის აუცილებლობას. დემოკრატიული ინსტიტუტებისადმი ნდობის აღსადგენად, ევროკავშირი ქვეყნის ხელისუფლებას კონსტრუქციულ დიალოგში ჩართვისკენ მოუწოდებს.

"ევროკავშირი საქართველოს შეახსენებს ფუნდამენტური თავისუფლებების დაცვის ვალდებულებას და მოუწოდებს იმ ბოლო დროს მიღებული საკანონმდებლო აქტების გაუქმების ან არსებითი გადასინჯვისკენ, რომლებიც ადამიანის უფლებათა საერთაშორისო სტანდარტებს აზიანებს. ევროკავშირი ღრმა შეშფოთებას გამოთქვამს სამოქალაქო საზოგადოების ორგანიზაციების წინააღმდეგ მართლმსაჯულების სისტემის პოლიტიკურად მოტივირებული გამოყენებისა და ისეთი რეპრესიული ზომების მიღების გამო, რომლებიც ოპოზიციურ ფიგურებს, ადამიანის უფლებათა დამცველებსა და დამოუკიდებელ მედიას მიზანში იღებს. ევროკავშირი მკაცრად გმობს თვითნებურ დაკავებებსა და მზარდ რეპრესიებს, მათ შორის ოპოზიციის ლიდერების, დამოუკიდებელი ჟურნალისტების, მედიამუშაკებისა და სამოქალაქო საზოგადოების წარმომადგენლების დაპატიმრებას. ევროკავშირი ხაზს უსვამს საქართველოს აუცილებლობას, მოაგვაროს ეს პრობლემები, თავისი პოლიტიკა საერთაშორისო სტანდარტებთან შესაბამისობაში მოიყვანოს და ჩაერთოს კონსტრუქციულ დიალოგში დემოკრატიული ინსტიტუტებისადმი ნდობის აღსადგენად," — წერია განცხადებაში