ჯარიმის და საურავების სახით მიმდინარე წლის ბიუჯეტში 127 807.1 ათასი ლარია მობილიზებული, რაც საპროგნოზო მაჩვენებლის (84 000.0 ათასი ლარი) 152.2%-ია — ინფორმაციას IPN 2026 წლის სახელმწიფო ბიუჯეტის შესრულების 6 თვის ანგარიშზე დაყრდნობით ავრელებს.

ბიუჯეტის შესრულების იანვარ-ივნისის ანგარიშს პარლამენტის კომიტეტები იხილავს. დოკუმენტს დეპუტატებს ფინანსთა მინისტრის მოადგილე გიორგი კაკაურიძე აცნობს.

"გვაქვს სამწუხარო რეალობა, რომ გახშირებულია სატრანსპორტო საშუალებებით მოძრაობის წესების დარღვევა, რასაც შესაბამისი ჯარიმები მოჰყვება. ბოლო 6 თვეში ჯარიმების მიმართულებით ცვლილებები არ ყოფილა — რაც გასულ წელს იყო დადგენილი, იგივეა დადგენილი, თუმცა დარღვევა მეტია. ეს მხოლოდ სატრანსპორტო საშუალებების ნაწილში არ არის. ის რომ კომპანიები ვალდებულებებს ვერ ასრულებენ, საკმაოდ გააქტიურებულია მუნიციპალიტეტები და ინფრასტრუქტურის სამინისტრო და თუ კომპანია ვალდებულებებს არ ასრულებს, გაფორმებული ხელშეკრულებიდან გამომდინარე ჯარიმების გადახდა უწევს," — განმარტა კაკაურიძემ პარლამენტის რეგიონული პოლიტიკის კომიტეტის სხდომაზე.

დოკუმენტის თანახმად, 2026 წლის იანვარ-ივნისის ნაერთი ბიუჯეტის შემოსავლების საპროგნოზო მაჩვენებელი განისაზღვრა 14 507 900.0 ათასი ლარით, საანგარიშო პერიოდში მობილიზებულ იქნა 15 086 701.2 ათასი ლარი ანუ საპროგნოზო მაჩვენებლის 104.0%.

გადასახადების საპროგნოზო მაჩვენებელი განისაზღვრა 13 057 400.0 ათასი ლარით, საანგარიშო პერიოდში მობილიზებულ იქნა 13 303 018.4 ათასი ლარი ანუ საპროგნოზო მაჩვენებლის 101.9%. ასევე საანგარიშო პერიოდში ზედმეტად გადახდილი გადასახადების (დღგ) დაბრუნების მაჩვენებელმა 1 377 800.5 ათასი ლარი შეადგინა.

გრანტების საპროგნოზო მაჩვენებელი განისაზღვრა 195 000.0 ათასი ლარით, საანგარიშო პერიოდში მობილიზებულ იქნა 170 037.9 ათასი ლარი — საპროგნოზო მაჩვენებლის 87.2%.

სხვა შემოსავლების საპროგნოზო მაჩვენებელი განისაზღვრა 1 255 500.0 ათასი ლარით, საანგარიშო პერიოდში მობილიზებულ იქნა 1 613 644.9 ათასი ლარი — საპროგნოზო მაჩვენებლის 128.5%.

არაფინანსური აქტივების კლებიდან მობილიზებულ იქნა 248 168.7 ათასი ლარი, რაც საპროგნოზო მაჩვენებლის (185 000.0 ათასი ლარი) 134.1%-ია.

ფინანსური აქტივების კლებიდან მობილიზებულ იქნა 163 226.4 ათასი ლარი, რაც საპროგნოზო მაჩვენებლის (176 400.0 ათასი ლარი) 92.5%-ია.