არქიტექტორები უკვე დიდი ხანია, რაც თავისი ნამუშევრების გასაცოცხლებლად ფერებს ოსტატურად იყენებენ. თვალისმომჭრელი ანტიკური ტაძრებით დაწყებული, ფერადი ბიბლიოთეკით დასრულებული — წარმოგიდგენთ 8 შენობას, სადაც ფერები არქიტექტურის განუყოფელი ნაწილია.

1. რანგანათას ტაძარი, ტამილ ნადუ, ინდოეთი

ინდოეთის სამხრეთში მდებარე შტატი ტამილ ნადუ ფერების გამოყენების უძველესი ტრადიციითაა ცნობილი. რანგანათას ტაძრის მშენებლობა ახ. წ. I საუკუნეში დაიწყო და XX საუკუნის მიწურულამდე გრძელდებოდა. შედეგად კი, მსოფლიოში ერთ-ერთი უდიდესი რელიგიური კომპლექსი მივიღეთ.

2. კატალონიური მუსიკის სასახლე, ბარსელონა, ესპანეთი

ეს 1908 წელს აგებული საკონცერტო დარბაზი ესპანეთის რეგიონის — კატალონიის სიმბოლოდ იქცა. არქიტექტორ ლუის დომენიკ ი მონტანერის დაპროექტებული შენობის არქიტექტურა მოდერნსა და რომანულ სტილებს გოთიკური აღორძინების ელემენტებთან აერთიანებს.

3. გარდიანის შენობა, დეტროიტი, აშშ

უირტ როულენდის დაპროექტებულ 1929 წლის შენობას ადგილობრივები ფინანსების ტაძრის სახელით იცნობენ. ის მსოფლიოს ერთ-ერთი გამორჩეული არტ-დეკოს სტილის ცათამბჯენია. შენობის ექსტერიერი თითქმის 2 მილიონი ფორთოხლისფერი აგურისა და ტერაკოტის ფილისგან შედგება. ინტერიერს კი სამსართულიანი თაღოვანი ჭერი ამშვენებს.

4. De Bijenkorf-ის მაღაზია, ეინდჰოვენი, ნიდერლანდები

ცნობების თანახმად, იტალიელმა არქიტექტორმა, დიზაინერმა და მხატვარმა ჯო პონტიმ ამ პროექტის შექმნისას შთაგონება თვითმფრინავის ფანჯრიდან დანახული ნიდერლანდების სასოფლო-სამეურნეო სავარგულების გეომეტრიული ორნამენტებიდან აიღო. ამხელა შენობის მიმზიდველად ქცევა ბევრი არქიტექტორისთვის შესაძლოა დიდ გამოწვევად ქცეულიყო, თუმცა არა პონტისთვის — ადამიანისთვის, რომელსაც მოდერნიზმის განვითარებაში საკმაოდ დიდი წვლილი მიუძღვის.

5. საცხოვრებელი კომპლექსი Reversible Destiny, ტოკიო, იაპონია

ეს საცხოვრებელი პროექტი შეზღუდული შესაძლებლობების მქონე პირთა უფლებადამცველისა და მწერლის, ჰელენ კელერის ხსოვნას მიეძღვნა. შენობის შემქმნელ ხელოვან არაკავასა და პოეტ ჯინსს სურდათ, რომ მათ მიერ შერჩეულ ფერებს მაცხოვრებლებისთვის თავგზა აებნია.

6. მაიშიმას ნარჩენების გადამამუშავებელი ქარხანა, ოსაკა, იაპონია

ქარხნის არქიტექტორი და ავსტრიელი ვიზუალური ხელოვანი ფრიდენსრაიხ ჰუნდერტვასერი 2000 წელს, შენობის დასრულებამდე ერთი წლით ადრე გარდაიცვალა. ის ცნობილი იყო მოდერნიზმის ერთფეროვნების უარყოფით და არქიტექტურას აღიქვამდა, როგორც განვითარებად ორგანიზმს.

7. ლეგანესის ცენტრალური ბიბლიოთეკა, ლეგანესი, ესპანეთი

ეს 2019 წელს აგებული საჯარო ბიბლიოთეკა და მუნიციპალური არქივი მისივე შინაარსის ვიზუალური მეტაფორაა. შენობის მომრგვალებულ გვერდებს კერამიკის ამოზნექილი ფასადი ფარავს, რაც ადგილობრივებს თაროებზე განთავსებული წიგნების რაოდენობასა და მრავალფეროვნებაზე მიანიშნებს.

8. კროიდონის კოლონადა, ლონდონი, დიდი ბრიტანეთი

კროიდონის 50-მეტრიანი საფეხმავლო სივრცე 16 გიგანტური სვეტისა და ორი დიდი კედლისგან შედგება. ადამ ნათანიელ ფურმანის მიერ 2023 წელს შექმნილი ნაგებობა ხელნაკეთი ფაიფურის ფილებითაა მოპირკეთებული. სვეტების ძირი მუქი ლურჯია, ზედა მხარე კი ნელ-ნელა ღიავდება.