ქართული ოცნების თავმჯდომარე, ირაკლი კობახიძე აცხადებს, რომ "საცოდავი" ის არის, ვინც არჩევნების შემდეგ საზოგადოებას "ემალება". ამის შესახებ მან ჟურნალისტებთან ისაუბრა და კომენტარი გააკეთა მას შემდეგ, რაც გიორგი გახარიას გუნდის წევრმა, ნათია მეზვრიშვილმა აღნიშნა, რომ კობახიძეზე "სიბრალულის გარდა" კომენტარს არ გააკეთებდა.

"საცოდავი არის კაცი, რომელიც არჩევნების შემდეგ თვეების განმავლობაში ემალება საზოგადოებას და ემალება საკუთარ წევრებსაც კი. ასეთი ადამიანი არის, რა თქმა უნდა, საცოდავი", — განაცხადა მან.

ჟურნალისტის კითხვას, თქვენ გეცოდებათ გახარია, კობახიძემ უპასუხა:

"მე არ მეცოდება, საცოდავია".

კობახიძემ 18 თებერვალსაც ისაუბრა გუნდის ყოფილ წევრზე და განაცხადა, რომ გახარიას მიერ ჩატარებული სპეცოპერაციების უკან, შესაძლოა, ნაციონალური მოძრაობა იდგეს. მისი თქმით, მოგვიანებით საზოგადოებას გახარიასა და ენმ-ის თანამშრომლობის დეტალებს აცნობებენ.

17 თებერვალს კი "ოცნების" თავმჯდომარემ ყოფილ პრემიერმინისტრზე საუბრისას აღნიშნა, რომ საზოგადოებას გახარიაზე "უაღრესად საინტერესო ინფორმაციას" მიაწვდიან. კობახიძის თქმით, ინფორმაცია, როგორც გახარიას პრემიერმინისტრობის, ასევე, შინაგან საქმეთა მინისტრობისა პერიოდსა და "17-18 თებერვალსაც" შეიძლება შეეხებოდეს. მმართველი პარტიის თავმჯდომარემ აღნიშნა, რომ ეს არა სამართლებრივი პროცესი, არამედ პოლიტიკური განცხადება იქნება.