ქართული ოცნების თავმჯდომარის, ირაკლი კობახიძის განცხადებით, ყოფილი პრემიერმინისტრის გიორგი გახარიას მიერ ჩატარებული სპეცოპერაციების უკან შესაძლოა ნაციონალური მოძრაობა იდგეს. მისი თქმით, მოგვიანებით საზოგადოებას გახარიასა და ენმ-ის თანამშრომლობის დეტალებს აცნობებენ.

"არის დეტალები, რომლებიც უკავშირდება ალიანსს, კავშირებს, რომლებიც წარმოიშვა ჯერ კიდევ ბევრად ადრე, ვიდრე გახარია გავიდოდა ჩვენი პოლიტიკური გუნდიდან. ძალიან ბევრი დეტალი, ნიუანსი შეიძლება იყოს საინტერესო საზოგადოებისთვის, თანამშრომლობის დეტალებზე გვაქვს საუბარი, რასაც მოგვიანებით ვაცნობებთ საზოგადოებას. შეიძლება, ეს იყოს დაფინანსებასთან დაკავშირებული საკითხები, შეიძლება, იყოს კონკრეტული ქმედებები, რომლებიც ნაკარნახევი იყო ამ ალიანსით და ასე შემდეგ. მაგალითად, გახსოვთ, რომ იყო ძალიან საეჭვოდ ჩატარებული სპეცოპერაციები, იგივე პანკისში, იგივე 20 ივნისს და ასე შემდეგ. შეიძლება, ამის უკანაც იდგეს ნაცმოძრაობის კვალი", — ამბობს ის.

გუშინ, 17 თებერვალს ირაკლი კობახიძემ განაცხადა, რომ საზოგადოებას გახარიაზე "უაღრესად საინტერესო ინფორმაციას" მიაწვდიან. კობახიძის თქმით, ინფორმაცია, როგორც გახარიას პრემიერმინისტრობის, ასევე, შინაგან საქმეთა მინისტრობისა პერიოდსა და "17-18 თებერვალსაც" შეიძლება შეეხებოდეს. მმართველი პარტიის თავმჯდომარე დასძენს, რომ ეს არა სამართლებრივი პროცესი, არამედ პოლიტიკური განცხადება იქნება.