16 თებერვლის ვაჭრობის შედეგად, ლარი დოლართან და ევროსთან მიმართებით გამყარდა.

დღეს დადგენილი კურსის მიხედვით, ერთი დოლარის ღირებულება 2,9934 ლარი გახდა, რაც აქამდე მოქმედ კურსთან შედარებით 3,42 თეთრით გამყარებას ნიშნავს.

რაც შეეხება ევროს, ამ ვალუტასთან მიმართებით ლარი 2,83 თეთრით გამყარდა და ერთი ევრო 3,4065 ლარს გაუტოლდა.

ბოლო ერთი თვის განმავლობაში ლარი გამყარების ტენდენციით ხასიათდებოდა. გუშინ, 15 თებერვალს კი ეროვნული ვალუტა დოლართან მიმართებით თითქმის 6 თეთრით გაუფასურდა.

ლარის გამყარების ძირითად მიზეზად ფულადი გზავნილების ზრდა, ტურიზმისა და ექსპორტის გააქტიურება სახელდება. ამასთან, ეკონომისტების აზრით, ლარის გამყარებას გამკაცრებული მონეტარული პოლიტიკაც უწყობს ხელს.

სებ-ის მიერ დღეს დადგენილი გაცვლითი კურსი ხვალ, 17 თებერვალს შევა ძალაში.