რუსეთის თავდაცვის სამინისტრო ისევ ირწმუნება, უკრაინის საზღვრის მიმდებარედ მობილიზებული ჯარები დისლოკაციის ადგილზე გადაჰყავთ. ამჯერად სამინისტრომ ვიდეო გამოაქვეყნდა და ამბობს, რომ მას შემდეგ, რაც წვრთნები დასრულდა, ყირიმის ნახევარკუნძულიდან დანაყოფები გაჰყავთ.

"სამხრეთის სამხედრო დანაყოფები, რომლებმაც ყირიმის ნახევარკუნძულის საწვრთნელ პოლიგონზე ტაქტიკურ წვრთნებში მონაწილეობა დაასრულეს, რკინიგზით დისლოკაციის ადგილს უბრუნდებიან", — აცხადებენ ისინი.

შეგახსენებთ, რუსეთის თავდაცვის სამინისტრო გუშინდელი დღიდან ამტკიცებს,რომ უკრაინის საზღვართან მყოფი ჯარები წვრთნების დასრულების შემდეგ მუდმივი განლაგების პუნქტებს უბრუნდებიან. ეს განცხადება მას შემდეგ გაჟღერდა, რაც უკრაინის პრეზიდენტმა განაცხადა, რომ თავდასხმა 16 თებერვალს იგეგმება.

პენტაგონის ინფორმაციით, ბოლო დღეების განმავლობაში, რუსეთის პრეზიდენტმა, ვლადიმერ პუტინმა უკრაინის საზღვართან და ბელარუსის ტერიტორიაზე დამატებითი სამხედრო ძალები განათავსა.

14 თებერვალს უკრაინის პრეზიდენტმა, ვოლოდიმირ ზელენსკიმ მოსახლეობისთვის სპეციალური ვიდეომიმართვა გაავრცელა, რომელშიც მოსალოდნელ ომზე ისაუბრა. მისი განცხადებით, ეუბნებიან, რომ 16 თებერვალს დაიწყება სამხედრო ინტერვენცია, რასაც ისინი ერთობით უპასუხებენ. კერძოდ, ზელენსკიმ განაცხადა, რომ ამ დღეს უკრაინის დროშების და ცისფერ-ყვითელი ლენტების გამოფენით შეხვდებიან და მსოფლიოს მათ ერთიანობას აჩვენებენ.

11 თებერვალს ამერიკის შეერთებული შტატების სახელმწიფო მდივნმა, ენტონი ბლინკენმა განაცხადა, რომ რუსეთი უკრაინაში, შეიძლება, ნებისმიერ დროს შეიჭრას.

გაიგე მეტი: