Euphoria (ეიფორია) ბოლო პერიოდის ერთ-ერთ ყველაზე ხმაურიან სერიალად იქცა, რომელსაც უკვე ერთგული ფანების ურიცხვი არმია ჰყავს. თუმცა არც კრიტიკოსები აკლია.

ყველაზე ხშირად HBO-ს ამ სატელევიზიო შოუს ნარკოტიკების მოხმარების ჭარბი ჩვენებისთვის აკრიტიკებენ: მაგალითად, ცოტა ხნის წინ ნარკოდამოკიდებულებასთან მებრძოლი ორგანიზაციის D.A.R.E. წარმომადგენელმა განაცხადა, რომ ეიფორია "მცდარად და არასწორად" წარმოაჩენს უფროსკლასელების მიერ ნარკოტიკების მოხმარებას და "ისე აჩვენებს, თითქოს ნარკოდამოკიდებულება, ანონიმური სექსი, ძალადობა და სხვა დესტრუქციული ქმედებები საყოველთაოდ გავრცელებული და ჩვეულებრივი რამაა თანამედროვე მსოფლიოში".

ამ შეფასებას მსახიობი ზენდეია გამოეხმაურა, რომელიც ერთი მხრივ შოუში მთავარ როლს ასრულებს და ნარკოდამოკიდებულ თინეიჯერს, რუს, განასახიერებს, ამავდროულად კი სერიალის თანაპროდიუსერია.

"ჩვენი სერიალი მორალური ზღაპარი არ არის, რომელიც ადამიანებს ასწავლის, თუ როგორ იცხოვრონ ან რა გააკეთონ. ჩვენ ყველას, ვინც შოუს შექმნაზე მუშაობს, სურვილი ისაა, რომ ვცადოთ, ნაკლებად მარტო იგრძნონ თავი იმ ადამიანებმა, ვისთვისაც ეს გამოცდილება ნაცნობია და მათი ტკივილი გავიზიაროთ. გვინდა ვაჩვენოთ, რომ ისინი ერთადერთები არ არიან, ვისაც მსგავს პრობლემებთან გამკლავება უწევს", — განაცხადა მსახიობმა.

ზენდეიას თქმით, მისი პერსონაჟი მაყურებელს კარგად აჩვენებს, თუ როგორი დამაზიანებელი, მძიმე და რთულია ნარკოდამოკიდებულება ყველასთვის:

"ნარკოტიკების გამო რუმ საკუთარ ცხოვრებაზე კონტროლი დაკარგა. მას იმის შესაძლებლობაც არ აქვს, რომ თავისი ემოციები ან სხეული მართოს. ის საშინელ ტკივილს განიცდის და სწორედ ამ შინაგანი ემოციების ჩვენება გვინდოდა და იმისაც, თუ როგორ მოქმედებს ეს ყველაფერი მათზე, ვის საყვარელ ადამიანსაც ამის გამოვლა უწევს".

საბოლოოდ კი, თავისი დამოკიდებულება ასე შეაჯამა:

"ყველაზე მეტად მინდა, რომ ადამიანებმა სერიალში ნაჩვენებ ისტორიასთან კავშირი იგრძნონ და ისინი, ვისაც რუს მსგავსად განკურნება და ცვლილება სჭირდება, იმედია, სეზონის ბოლოს იმედსა და ცვლილებას მასთან ერთად იგრძნობენ".

ამასთან დაკავშირებით თავის დროზე ეიფორიის რეჟისორმა, სემ ლევინსონმაც ილაპარაკა და აღნიშნა, რომ სერიალში აღწერილი მოვლენები მეტწილად თავისი პირადი გამოცდილებითაა შთაგონებული:

"ჩემი თინეიჯერობის უმეტესობა საავადმყოფოებსა და სარეაბილიტაციო ცენტრებში გავატარე. ნარკოდამოკიდებული ვიყავი და ყველაფერს იქამდე ვიღებდი, სანამ სუნთქვის, სმენისა და შეგრძნების უნარს არ დავკარგავდი. რამაც ამ მდგომარეობიდან გამომიყვანა, ერთი ფიქრი იყო: დღეს რომ მოვკვდე, ვინ ვიქნები? ქურდი. ნარკოდამოკიდებული. ჩემ ირგვლივ ყველა ძვირფას ადამიანს საშინლად ვექცეოდი. ჰოდა, ამავე ხმამ მითხრა, რომ ნარკოტიკებისთვის სამუდამოდ უნდა დამენებებინებინა თავი. უკვე 14 წელია, ასეა".

ამჟამად ეიფორიის მეორე სეზონი გამოდის, რომლის ფინალური სერიის პრემიერა 27 თებერვალს შედგება. უკვე ცნობილია ისიც, რომ სერიალი მესამე სეზონითაც დაბრუნდება.