კულტურის სამინისტროს დაფინანსებით კომპიუტერული თამაში, დიდგორი იქმნება. ამის შესახებ სამინისტრომ განცხადება გაავრცელა და თამაშის თრეილერი გამოაქვეყნა.

უწყების ცნობით, თამაშის თრეილერი გამოცხადებულ კონკურსში, ქართული კულტურის, ისტორიისა და მითოლოგიის პოპულარიზაციის ხელშემწყობი კომპიუტერული თამაშის შექმნა გამარჯვებული პროექტის, ძლევაი საკვირველის ფარგლებში შეიქმნა.

"სამინისტრომ გაითვალისწინა 21-ე საუკუნის ახალგაზრდების მზარდი ინტერესი ციფრული მედიის მიმართ და სწორედ ამის საფუძველზე გადაწყდა ისეთი პროექტის შექმნა, რომელიც თანამედროვე ტექნოლოგიების გამოყენების საშუალებით გააცოცხლებს ამ უმნიშვნელოვანეს ისტორიულ თარიღს და მოახდენს მის პოპულარიზაციას ახალგაზრდა თაობებში, მათი საჭიროებებისა და ინტერესების გათვალისწინებით", — ვკითხულობთ განცხადებაში.

მათი თქმით, თავად პროექტის პირველი ეტაპის რელიზი მაისის დასაწყისში იგეგმება. უწყებაში ამბობენ, რომ თამაშის მეშვეობით მოხდა ბრძოლის მაქსიმალურად რეალისტური სურათის აღდგენა — თამაშის მექანიკა აგებულია ტაქტიკური სტრატეგიის პრინციპზე, მეომრების აღჭურვილობა და ანიმაციურ ვიდეორგოლებში გადმოცემული ეპოქალური მოვლენები მაქსიმალურად ავთენტურია, ხოლო ილეთები დაეფუძნა ქართული საბრძოლო ხელოვნების ელემენტებს.