ქართული ოცნების დეპუტატის, გია ვოლსკის მტკიცებით, რუსთაველის თეატრის სამხატვრო ხელმძღვანელის, რობერტ სტურუასთვის მიწის სიმბოლურ ფასად გადაცემა პოლიტიკური გადაწყვეტილება არ არის. მისი თქმით, ის "მსოფლიო დონის თეატრალია", ამიტომ, შესაძლებელია, მას სახელმწიფომ გაწეული სამსახურისთვის გადასცეს ნაკვეთი.

"არ მინდა ნინო ბურჯანაძის თემას დავუბრუნდე, იმას რა დამსახურება ჰქონდა, მთელი ნახევარი წყნეთი რომ ერთ ლარად მისცეს? მაგრამ მნიშვნელობა არ აქვს, აქ პოლიტიკური გადაწყვეტილება არ არის მიღებული. რასაკვირველია, რობერტ სტურუა, ეს არის მსოფლიო დონის თეატრალი და შეიძლება, სახელმწიფომ მას, აი, მთელი თავისი ცხოვრების მანძილზე საქართველოსთვის გაწეული სამსახურისთვის 1 500 კვ.მეტრი გადასცეს შემდგომი განკარგვისათვის", — თქვა მან.

გუშინ, 5 თებერვალს TV პირველმა გაავრცელა ინფორმაცია, რომ სტურუას თბილისში, სოფელ თხინვალში მდებარე კვ.მ მიწის ნაკვეთი სიმბოლურ ფასად გადაეცა.

ეს ფაქტი იმ დოკუმენტებით დასტურდება, რომლის მიხედვითაც, სტურუა საჯარო რეესტრს მიწის ნაკვეთის სიმბოლურ ფასად გადაცემის მოთხოვნით მიმართავს.

აღსანიშნავია, რომ ვიდრე ამ განცხადების საფუძველზე საჯარო რეესტრი თბილისში მდებარე მიწის ნაკვეთს რობერტ სტურუას დაუკანონებდა, ეს ქონება სახელმწიფოს ეკუთვნოდა.

საჯარო დოკუმენტებითვე ირკვევა, რომ გადაფორმებიდან რამდენიმე დღეში სტურუამ მიწის ნაკვეთი როინ ნოზაძეს აჩუქა. მანამდე, მიწის ნაკვეთის სიმბოლურ ფასად გადაცემის პროცესში, როინ ნოზაძე სტურუას წარმომადგენელი იყო.

ტვ პირველთან თავად სტურუამ სახელმწიფოს მხრიდან მიწის ნაკვეთის სიმბოლურ ფასად გადაცემის ფაქტი უარყო. მან თქვა, რომ არც როინ ნოზაძეს იცნობს, რომელსაც აღნიშნული მიწა აჩუქა.

ამჟამად აღნიშნულ მიწის ნაკვეთსა და მასზე არსებულ 177.06 კვ.მ-ის შენობა-ნაგებობას შპს ჯეო-ოლიმპი ფლობს, რომლის 100%-იანი წილის მფლობელი აკაკი მოწონელიძეა. ტვ პირველის ინფორმაციით, რომელიც მათ მიერვე მოპოველ ნასყიდობის ხელშეკრულებას ეყრდნობა, როინ ნოზაძემ აკაკი მოწონელიძეს მიწის ნაკვეთი გასული წლის 2 დეკემბერს 221 250 დოლარად მიჰყიდა.