ადგილობრივი მედიის ცნობით, აზერბაიჯანს საქართველოდან განჯის კარიბჭის დაბრუნება სურს. მათი ინფორმაციით, ამის შესახებ ჟურნალისტებთან განჯაში კულტურის მინისტრმა, ანარ კარიმოვმა ისაუბრა. კარიმოვი ამბობს, რომ მოლაპარაკებები მიმდინარეობს და საკითხი მთავრობათაშორისი კომისიის დღის წესრიგში უკვე შევიდა.

"აზერბაიჯანული მხარის ინიციატივით, საქართველოსა და აზერბაიჯანს შორის არსებულ მთავრობათაშორის კომისიაზე საქართველოდან ჩვენს ქვეყანაში განჯის კარიბჭის დაბრუნების საკითხი დადგა [...] მოლაპარაკებები მიმდინარეობს. ეს არის არის ადვილი, რთულია, მაგრამ ჩვენი მიზანია განჯის კარიბჭე, აზერბაიჯანის ისტორია და მემკვიდრეობა აზერბაიჯანს დავუბრუნოთ", — აცხადებს ის.

კარიმოვმა აღნიშნა ისიც, რომ საქართველოს მხრიდან ამ კუთხით საერთო პოზიცია არ დაფიქსირებულა. მისივე თქმით, განჯის კარიბჭის დაბრუნებაზე საქართველოში წინა ვიზიტისასაც ისაუბრა და საკითხი შესაბამის საჯარო უწყებებთან განიხილა.

კარიმოვი საქართველოში 2021 წლის 7 ივლისს იმყოფებოდა, თუმცა მთავრობის ადმინისტრაციის მიერ გავრცელებულ განცხადებაში მხარეებს შორის საუბრის თემად განჯის კარიბჭის საკითხი მოხსენებული არ იყო.

On.ge-ს კულტურის სამინისტროში განუცხადეს, რომ თემის შესახებ ინფორმაციას არ ფლობენ და უცხო ქვეყნებთან ისინი მოლაპარაკებებს არ აწარმოებენ.

საგარეო საქმეთა სამინისტროს პრესსპიკერი აცხადებს, რომ საქართველოსა და აზერბაიჯანს შორის განჯის კარის საკითხი დღის წესრიგში არ დგას და ეს თემა არც მთავრობათაშორის ეკონომიკური კომისიის ოქმში ასახული არ არის.

"აზერბაიჯანის რესპუბლიკა საქართველოს სტრატეგიული პარტნიორია, რასაც ჩვენს ქვეყნებს შორის თანამშრომლობის ფართო სპექტრი ადასტურებს, მათ შორის, კულტურის მიმართულებით. რაც შეეხება განჯის კარის საკითხს, ის საქართველოსა და აზერბაიჯანს შორის ორმხრივ დღის წესრიგში არ დგას. შესაბამისად, აღნიშნული საკითხი არც საქართველოსა და აზერბაიჯანს შორის მთავრობათაშორისი ეკონომიკური კომისიის ოქმში არ არის ასახული, დოკუმენტი განსაზღვრავს, მათ შორის, კულტურის სფეროში თანამშრომლობის სხვადასხვა მიმართულებებს, მაგრამ განჯის კარის საკითხი არ არის დღის წესრიგში", — აღნიშნავს ის.

განჯის ჭიშკრის ნაწილი ახლა გელათის მონასტერში ინახება. როგორც ცნობილია, ის მე-12 საუკუნეში დემეტრე პირველმა ქალაქ განჯადან, ლაშქრობების შემდეგ, ნადავლის სახით წამოიღო და გელათის მონასტერს შესწირა.