თურქეთის პრეზიდენტმა, რეჯეპ ტაიპ ერდოღანმა თქვა, რომ მისი ხელისუფლება მიმდინარე წლის 16 აპრილს დაგეგმილი რეფერენდუმის შემდეგ პარლამენტში შეიტანს საკონსტიტუციო ინიციატივას, რომლის მიხედვითაც თურქეთში სიკვდილით დასჯა აღდგება. აღნიშნულ ცვლილებას სწორედ კონსტიტუციის შესწორება სჭირდება.

"16 აპრილის შემდეგ, უფლის ნებით, კანონპროექტი შევა პარლამენტში და თუ მას დაამტკიცებენ, მე ხელს მოვაწერ," - ერზერუმში გამართულ საპროტესტო აქციაზე თქვა ერდოღანმა. 16 აპრილს თურქეთში რეფერენდუმი იმართება, რომლის შედეგების მიხედვით, მნიშვნელოვნად იზრდება პრეზიდენტის ძალაუფლება და თურქეთი საპრეზიდენტო ქვეყანა ხდება.

Hurriyet Daily News-ის ცნობით, თურქეთში სიკვდილით დასჯა 1984 წლიდან არ მოქმედებდა, თუმცა საბოლოოდ ის 2004 წელს აიკრძალა, როგორც ევროკავშირისკენ მიმავალ გზაზე ერთ-ერთი დაბრკოლება. თუმცა, რადგან თურქეთის ევროკავშირში გაწევრიანება გაჭიანურდა რიგი მიზეზების გამო, ერდოღანის ხელისუფლება მიიჩნევს, რომ ევროპამ დანაპირები არ შეასრულა და ამიერიდან ისე მოქმედებას აპირებს, როგორც ამას თავად მიიჩნევს საჭიროდ.

როგორც ერდოღანმა თქვა, სიკვდილით დასჯის აღდგენას ყველა ძირითადი ოპოზიციური პარტიის ლიდერი და პრემიერმინისტრი, ბინალი ილდირიმიც ეთანხმება. მისივე თქმით, თუ პარლამენტი არ დაუჭერს ამ ინიციატივას მხარს, ის რეფერენდუმს დანიშნავს, რათა "ხალხმა გადაწყვიტოს."

თურქეთში სიკვდილით დასჯის აღდგენაზე საუბარი ხელისუფლებამ 2016 წლის 15 აპრილის გადატრიალების მცდელობის შემდეგ მიიღო. ამ დღის შემდეგ თურქეთის ხელისუფლებამ ათასობით ადამიანი დააპატიმრა და სამსახურიდან გაათავისუფლა. ე.წ. წმენდაში მოყოლილთა რაოდენობა 100 ათასს აჭარბებს. მათ შორის არიან ჟურნალისტები, მოსამართლეები, პროკურორები, სამხედროები, მასწავლებლები, პოლიციელები და ყველა ის ადამიანი, ვინც ფეტულა გიულენის ორგანიზაციასთან არის შემჩნეული.

თურქეთის ხელისუფლება სწორედ ამერიკაში მცხოვრებ ფეტულა გიულენს ადანაშაულებს გადატრიალების მცდელობაში და მის ორგანიზაციას ტერორისტულს უწოდებს.

თურქეთის ოპოზიციურ ძალებსა და დასავლელ ლიდერებს მიაჩნიათ, რომ თურქეთის ხელისუფლება 15 ივლისის გადატრიალების მცდელობა იყენებს ძალაუფლების უზურპაციისა და პოლიტიკური ოპონენტების დევნისთვის.