ცოტა ხნის წინ საფრანგეთმა ახალი კანონი მიიღო, რომელიც ეგრეთ წოდებულ გარდაქმნის თერაპიას დანაშაულებრივ ქმედებად აცხადებს და შესაბამის სასჯელსაც ითვალისწინებს. გადაწყვეტილება ეროვნულმა ასამბლეამ ერთხმად მიიღო — 142 მომხრე არცერთის წინააღმდეგ.

"გარდაქმნის თერაპია" იმ არასწორ წარმოდგენას ემყარება, რომლის მიხედვითაც ადამიანის სექსუალური ორიენტაციის ან გენდერული იდენტობის შეცვლა და "განკურნება" შესაძლებელია. ამ საზრისს ამერიკისა და ევროპის კონტინენტებზე ავტორიტეტული სამედიცინო ასოციაციები არ იწყნარებენ, თუმცა, მსგავს სერვისებს, ძირითადად, რელიგიური ორგანიზაციები, მოქალაქეებს ჯერ კიდევ სთავაზობენ რამდენიმე ქვეყანაში. ხშირ შემთხვევაში ამ პროცესის გავლა ძალდატანებითია.

ამიერიდან, საფრანგეთში ნებისმიერ პირს, ვისაც ახალი კანონი დამნაშავედ ცნობს, შეიძლება $34 ათასამდე ჯარიმა და თავისუფლების ორი წლით აღკვეთა შეეფარდოს.

გადაწყვეტილებას დადებითად გამოეხმაურა ქვეყნის პრეზიდენტი, ემანუელ მაკრონი. მან ტვიტერზე დაწერა, რომ "დანაშაული არაა, იყო ის, ვინც ხარ".

კანონის მიღებას მხარი დაუჭირა სენატმაც, საფრანგეთის პარლამენტის ზემო პალატამ, სადაც მომხრე 305 დეპუტატი აღმოჩნდა, წინააღმდეგი კი 28 წავიდა — ეს უკანასკნელნი, კონსერვატიულ რესპუბლიკურ პარტიას წარმოადგენენ.

ახალი კანონი ქვეყანაში მომდევნო ორი კვირის განმავლობაში, მაკრონის მიერ ხელის მოწერისთანავე ამოქმედდება.

გაეროს ექსპერტებმა არაერთხელ დაგმეს ლგბტქ ადამიანების "გარდაქმნის თერაპია", რომელიც მოიცავს სესიებს, ინიექციებს, ელექტროშოკის გამოყენებას და ლოცვას, რათა პირის სექსუალური ორიენტაცია ან გენდერული იდენტობა შეიცვალოს.

ეს პრაქტიკა უკვე აიკრძალა რამდენიმე სხვა ქვეყანაშიც, მათ შორის, ბრაზილიაში, ეკვადორში, ალბანეთში, გერმანიაში, მალტაზე და გაერთიანებულ სამეფოში. ამ სახელმწიფოებს რამდენიმე კვირის წინ შეუერთდა კანადაც.