მმართველი გუნდის თავმჯდომარე ირაკლი კობახიძე ფიქრობს, რომ ოპოზიციის კრიტიკა რეზოლუციასთან დაკავშირებით "სიტყვებზე გამოკიდება" და "სპეკულაციაა". მეტიც მისი აზრით, ურკაინის მხარდამჭერ რეზოლუციაში აგრესორის, რუსეთის არხსენების გამო კრიტიკა "მეორეხარისხოვან თემებზე" აქცენტის გადატანაა. კობახიძე მიიჩნევს, რომ რეზოლუციაში არის ნათქვამი ყველაფერი, "რაც უნდა ყოფილიყო ნათქვამი".

"ჩვენ, რა თქმა უნდა, ვგულშემატკივრობთ ჩვენს მეგობარ უკრაინელ ხალხს, ისინი არიან ჩვენი მეგობრები და ჩვენთვის მნიშნველოვანია, პირველ რიგში ამის გამო, რომ ეს სამხედრო ესკალაცია არ შედგეს. სწორედ ამას ეხება ეს რეზოლუცია, რომელიც ჩვენ დავაინიცირეთ, ომის არდაშვება არის მთავარი ამოცანა, ბუნებრივია ჩვენთვის და ეს უნდა იყოს მთავარი ამოცანა საერთაშორისო თანამეგობრობისთვის. ზუსტად ამას ეხება ეს რეზოლუცია.

რაც შეეხება იქ სიტყვებზე გამოკიდებას, ეს არის ცალსახა სპეკულაცია. მეორეხარისხოვან თემებზე აქცენტის გადატანა არის არასწორი იმ დროს, როდესაც რეზოლუციაში არის ნათქვამი ყველაფერი, რაც უნდა ყოფილიყო ნათქვამი", — განაცხადა მან იმედის ეთერში.

უკრაინის მხარდამჭერი რეზოლუციის შემუშავების ინიციატივა ოპოზიციური ფრაქციების ლიდერებს ეკუთვნით. 24 იანვარს გამართულ ბრიფინგზე მათ მმართველ პარტიას ერთიანი ტექსტის შემუშავება შესთავაზეს. დღეს დილიდან დეპუტატები რეზოლუციასთან დაკავშირებით კონსულტაციებს მართავდნენ, თუმცა შეთანხმება ვერ მოახერხეს.

რეფორმების ფრაქციის წევრის, ხათუნა სამნიძის ინფორმაციით, ქართულმა ოცნებამ მათ საკუთარი ვერსია შესთავაზა და განხილვის შემდეგ ისინი პრინციპულ საკითხებზე შეთანხმდნენ. თუმცა, მისივე თქმით, შესვენების დროს "ოცნების" დეპუტატებმა გადაწყვიტეს ტექსტის თავდაპირველი ვერსია დაებრუნებინათ, რის გამოც ოპოზიციამ თანაავტორობაზე უარი თქვა.

კერძოდ, იმ ვერსიაში, რომელიც მმართველმა პარტიამ ოპოზიციურ პარტიებს შესთავაზა, რუსეთი ნახსენები არ არის. მამუკა მდინარაძე აცხადებს, რომ რეზოლუცია, რომელსაც საქართველოს პარლამენტი მიიღებს, დაცლილია პოპულისტური თუ პროვოკაციული რიტორიკისგან.

ამავე თემაზე: