ქართული ოცნების აღმასრულებელი მდივანი, მამუკა მდინარაძე აცხადებს, რომ რეზოლუცია, რომელსაც საქართველოს პარლამენტი მიიღებს უკრაინაში განვითარებულ მოვლენებთან დაკავშირებით დაცლილია პოპულისტური თუ პროვოკაციული რიტორიკისგან.

"ჩვენ ორი დღის განმავლობაში მცდელობა ნამდვილად არ დაგვიკლია იმისათვის, რომ გათვალისწინებული ყოფილიყო რეზოლუციის ტექსტში ყველა ფრაქციის თუ პოლიტიკური ჯგუფის ინტერესი, რომელიც არის პარლამენტში.

ყველას წინადადებები მოვისმინეთ, ნაწილი გავიზიარეთ, ნაწილი არ გავიზიარეთ იმიტომ, რომ ისინი ერთმანეთთან თანხვედრაში არ იყო, თუმცა ასევე, მიგვაჩნია, რომ ეს არის ის საკითხი, სადაც პირველ რიგში, უნდა გამოვდიოდეთ ეროვნული ინტერესებიდან, ასევე, რა თქმა უნდა, პირველ რიგში უნდა გამოვდიოდეთ ჩვენი მეგობარი უკრაინელი ხალხის ინტერესებიდან, მათი უფლებების დაცვის ინტერესებიდან, მათი სუვერენიტეტის დაცვის და ტერიტორიული მთლიანობის დაცვის ინტერესებიდან და აქედან გამომდინარე, უნდა იყოს შეჯერებული და ისეთი ტექსტი რეზოლუციისა, რომელსაც საბოლოო ჯამში, საქართველოს პარლამენტი მიიღებს, რომელიც აქვე დავძენ, რომ დაცლილია ყოველგვარი პოპულისტური თუ პროვოკაციული რიტორიკისგან", — განაცხადა მდინარაძემ პარლამენტში ჟურნალისტებთან საუბრისას.

ქართული ოცნება დღეს დააინიცირებს უკრაინის მხარდამჭერ რეზოლუციას, რომელშიც რუსეთი ნახსენები არ არის.