"რუსეთის არ ხსენება გავიგეთ, მაგრამ აფხაზეთი და ცხინვალი რომ ახსენოთ იმ რეზოლუციაში, ეგეც არ მოსულა?" — ამ კითხვით მიმართავს ქართულ ოცნებას გირჩი — მეტი თავისუფლება. ასე ეხმაურებიან ისინი უკრაინის მხარდამჭერი რეზოლუციის მმართველი გუნდისეულ ვერსიას, რომელშიც რუსეთი ნახსენები არ არის.

"ეგეც გააღიზიანებს? ასეთ შემთხვევაში თუ არ ახსენებთ, აბა როდის ახსენებთ? თქვენ თუ არ ახსენებთ, სხვები, ამერიკა, ევროპა, რატომ ახსენებენ? ვაჩუქეთ?" — ვკითხულობთ გირჩის განცხადებაში.

უკრაინის მხარდამჭერი რეზოლუციის შემუშავების ინიციატივა ოპოზიციური ფრაქციების ლიდერებს ეკუთვნით. 24 იანვარს გამართულ ბრიფინგზე მათ მმართველ პარტიას ერთიანი ტექსტის შემუშავება შესთავაზეს. დღეს დილიდან დეპუტატები რეზოლუციასთან დაკავშირებით კონსულტაციებს მართავდნენ, თუმცა შეთანხმება ვერ მოახერხეს.

რეფორმების ფრაქციის წევრის, ხათუნა სამნიძის ინფორმაციით, ქართულმა ოცნებამ მათ საკუთარი ვერსია შესთავაზა და განხილვის შემდეგ ისინი პრინციპულ საკითხებზე შეთანხმდნენ. თუმცა, მისივე თქმით, შესვენების დროს "ოცნების" დეპუტატებმა გადაწყვიტეს ტექსტის თავდაპირველი ვერსია დაებრუნებინათ, რის გამოც ოპოზიციამ თანაავტორობაზე უარი თქვა.

კერძოდ, იმ ვერსიაში, რომელიც მმართველმა პარტიამ ოპოზიციურ პარტიებს შესთავაზა, რუსეთი ნახსენები არ არის. მამუკა მდინარაძე აცხადებს, რომ რეზოლუცია, რომელსაც საქართველოს პარლამენტი მიიღებს, დაცლილია პოპულისტური თუ პროვოკაციული რიტორიკისგან.