როგორც ჩანს, ხავიერ ბარდემს წვეულებები ძალიან უყვარს და დენიელ კრეიგთან ერთად მიცემულ ბოლო ინტერვიუში იმის შესახებ ისაუბრა, თუ როგორ აღნიშნეს ერთად დაბადების დღე.

ბარდემის თქმით, კრეიგს მასზე ერთი დღით გვიან აქვს დაბადების დღე."ჩვენ ბევრი რამ გვაქვს საერთო, თითქმის ერთ დღეს დავიბადეთ და ერთხელ დაბადების დღე ერთადაც კი აღვნიშნეთ", — გაიხსენა ბარდემმა.

ხავიერ ბარდემი და დენიელ კრეიგი ერთად თამაშობენ ფილმში Skyfall, რომელშიც კრეიგი ტრადიციულად ჯეიმს ბონდს განასახიერებს, ბარდემი კი ანტიგმირის როლში გვევლინება.

ფოტო: Getty Images

როგორც ბარდემი ამბობს, საერთო დაბადების დღეზე დრაგშოუ გამართეს და სერენადებიც იმღერეს. "იმ ღამით "ბონდის გოგოს" ფორმით დაბადების დღის ტორტიდან უნდა ამოვმხტარიყავი და ასეც მოვიქეცი, ღმერთო ჩემო", — გაიხსენა ბარდემმა. შემდეგ კი მსახიობმა იხუმრა, რომ ეს მისი ერთადერთი მუსიკალური გამოცდილება იყო, სანამ Being the Ricardos-ში როლს მიიღებდა.

"გარდა იმისა, რომ "ბონდის გოგოს" ფორმაში ტორტიდან ამოვხტი, მერლინ მონროს სტილში Happy Birthday to You ვიმღერე", — გაიხსენა მსახიობმა. იმის მიუხედავად, რომ მის მუსიკალურ შესაძლებლობებში ეჭვი ეპარებოდათ, ბარდემის თქმით, საღამომ წარმატებულად და მხიარულად ჩაიარა.