ჯონი დეპი საფრანგეთის მეფე ლუი XV-ის როლს შეასრულებს მაივენ ლე ბესკოს ახალ ფილმში, რომლის გადაღებებიც ზაფხულში იწყება.

მიუხედავად იმისა, რომ ფილმის ზუსტი სათაური და სიუჟეტი ცნობილი არ არის, ვიცით, რომ ის ლუი XV-ის ცხოვრების შესახებ იქნება, რომელიც ქვეყანას თითქმის 60 წელი მართავდა. მაივენ ლე ბესკო ცნობილი ფრანგი რეჟისორია, რომლის ფილმებმა სხვადასხვა დროს Mon Roi და Polisse კანის ჯილდოები მოიპოვა.

ჯონი დეპი, რომელსაც ყოფილი ცოლი ძალადობაში ადანაშაულებს, 2020 წელს გამოსულ ფილმ Minamata-ში მონაწილეობის შემდეგ როლზე არ დაუმტკიცებიათ. ამ როლზეც 2018 წელს დაამტკიცეს და გადაღებები 2019-ში მიმდინარეობდა. გარდა იმისა, რომ ამ სკანდალის შემდეგ ჯონი დეპს ახალი როლები არ მიუღია, Warner Bros-მა მისი კანდიდატურა Fantastic Beasts-დან დამტკიცების შემდეგ მოხსნა და მსახიობი მადს მიკელსენით ჩაანაცვლა.

ფოტო: Getty Images

"ვამაყობ იმ ხალხით, რომლებიც სიმართლის გარკვევას თავად ცდილობდნენ, რასაც მედიაში ვერ ამოიკითხავდით. ეს გრძელი გზაა, რომელიც ზოგჯერ უხერხულია, ზოგჯერ კი სულელურიც. მადლობა იმ ადამიანებს, რომლებიც ამ მძიმე დროს ჩემ გვერდით დარჩნენ და რაც უნდა მოხდეს, სწორედ მათ გამო ვიბრძოლებ", — განაცხადა ჯონი დეპმა ბოლო ინტერვიუში.

ჯონი დეპმა "გაუქმების კულტურის" (Cancel Culture) შესახებ 2021 წლის სან-სებასტიანის კინოფესტივალზეც ისაუბრა. "შემიძლია, ზუსტად გითხრათ, რომ დაცული არავინაა. ყველაფრის დანგრევას მხოლოდ ერთი წინადადება სჭირდება და წითელი ხალიჩა უკვე აღარ არსებობს. ეს მხოლოდ მე არ შემმთხვევია, რადგან ბრალდებების გამო მრავალი ქალი, კაცი თუ ბავშვი რთულ მდგომარეობაშია და არ აქვს მნიშვნელობა, როგორი ტონით არის ეს სიტყვები ნათქვამი", — ამბობს ჯონი დეპი.