ჯონი დეპი ამჯერად აცხადებს, რომ თავად იყო ყოფილი ცოლის, ამბერ ჰერდის მხრიდან ფიზიკური ძალადობის მსხვერპლი. წყვილი 2016 წელს განქორწინდა და ჰერდი იმ დროიდან აცხადებს, რომ ყოფილი ქმარი მასზე ძალადობდა.

ხმოვანი ჩანაწერი Daily Mail-მა გაავრცელა, რომელიც 2015 წელს ამბერმა თერაპევტთან ვიზიტისას შეთანხმებულად ჩაიწერა. მასში ცოლ-ქმარი ფიზიკურ დაპირისპირებაზე საუბრობს. ჩანაწერის აუთენტურობა დეპის ადვოკატმა, ადამ ვალდმენმა დაადასტურა.

"საყვარელო, მე შენთვის მუშტი არ დამირტყამს. უბრალოდ გაგარტყი. არ ვიცი, რა ფორმაში იყო ჩემი ხელები, მაგრამ მშვენივრად ხარ. არ მომიყენებია ტკივილი, მუშტები არ დამირტამს, მხოლოდ გაგარტყი", — ამბობს ამბერი ჩანაწერში.

ხმოვან აუდიოში დეპი ჰერდს ეუბნება, რომ უყვარს და არ სურს განქორწინება, თუმცა იმ შემთხვევაში, თუ ის მასზე კვლავ იძალადებს, დაშორება მოუწევთ:

"არ მინდა მიგატოვო, არ მინდა გავნქორწინდეთ. არ მინდა, რომ ჩემი ცხოვრებიდან წახვიდე. მხოლოდ სიმშვიდე მინდა. თუ საქმე ფიზიკურ დაპირისპირებამდე ისევ მივა, გაშორება მოგვიწევს".

ჰერდი პასუხობს, რომ ვერ შეპირდება, რომ სრულყოფილი იქნება:

"თუმცა გპირდები, რომ აღარ შეგეხები. ღმერთო ჩემო, ვიცი, რომ ხანდახან ვიშლები და მოთმინებას ვკარგავ, მაგრამ გპირდები ყველაფერს გავაკეთებ, რომ უკეთესობისკენ შევიცვალო".

დეპის ადვოკატის სიტყვებით, ჩანაწერი ამტკიცებს, რომ ჯეკ ბეღურას შემსრულებელი მსახიობი ცოლისგან გამუდმებული ფიზიკური ძალადობის მსხვერპლი იყო და დასძენს, რომ ამბერმა "თავისი დანაშაულის დასაფარად შეთხზა ისტორია, თითქოს მასზე ძალადობდნენ":

"ჰერდი ძალადობის მოტივად ამჟღავნებს, რომ დეპი [ამ სიტუაციისგან გასაქცევად] მასთან დაშორებას აპირებდა".

თავად ჰერდის სამართლებრივი წარმომადგენელი, რობერტა კაპლანი არ უარყოფს დეპის ბრალდებას ძალადობაზე, თუმცა ამტკიცებს, რომ ამბერიც ძალადობის მსხვერპლი იყო.

"ფაქტი, რომ ქალი იბრძვის ან პასუხს სცემს, არ ნიშნავს, რომ თავად გამუდმებული ოჯახური ძალადობის მსხვერპლი არაა", — აცხადებს ადვოკატი.

ჰერდის სარჩელის მიხედვით, როდესაც დეპი მასზე ძალადობდა, ის ტკივილისგან თავდასაღწევად და თავდაცვის მიზნით ნივთებს ესროდა.

2019 წლის მარტში ჯონი დეპმა ჰერდის წინააღმდეგ სარჩელი შეიტანა და რეპუტაციის შელახვის გამო 50 მილიონი დოლარი მოითხოვა. საპასუხოდ ჰერდმა ხელმეორედ შეიტანა სარჩელი, მისი მიხედვით, დეპი მას გამუდმებით სცემდა, როგორც ქორწინებამდე, ისე 18-თვიან ქორწინებაშიც.

სარჩელში წარმოდგენილია რამდენიმე ფოტო, რომელშიც ამბერ ჰერდს სახეზე და მკლავებზე დაზიანებები აქვს, ასევე არის თმის ფოტო, რომელიც ჰერდის მიხედვით, დეპმა მოჰგლიჯა. სარჩელში წარმოდგენილია დამტვრეული ნივთებისა და ავეჯის ფოტოები და მესიჯების სქრინები, რომლებიც ინციდენტს აღწერს. ჰერდი სარჩელში დეპს "მონსტრად" მოიხსენიებს.

თავად დეპმა კი განაცხადა, რომ ჰერდი მას მაშინ ესხმოდა თავს, როდესაც ნარკოტიკებისა და სასმელის ზემოქმედების ქვეშ იყო:

"ის მირტყამდა, ხელს მკრავდა, მესროდა ნივთებს, მათ შორის მძიმე ბოთლებს, ანთებულ სანთლებს, პულტს, რითიც ფიზიკურ ზიანს მაყენებდა".

დეპის სარჩელში წარმოდგენილია სურათები, რომლებშიც მისი დალურჯებული თვალი და დაზიანებული თითი ჩანს. ინციდენტი, რომლის დროსაც დეპმა შუა თითზე ტრავმა მიიღო, ავსტრალიაში მოხდა და მსახიობის მიხედვით, ამის მიზეზი დამტვრეული მინის ბოთლი გახდა.