გერმანიის პოლიცია იძიებს, დორტმუნდის ბორუსიას ავტობუსთან მომხდარი აფეთქების მოტივი ტერორიზმი ხომ არ იყო. ინფორმაციას ამის შესახებ გერმანული მედია ავრცელებს. მათი ცნობით, სამართალდამცავებმა აფეთქების შემდეგ ავტობუსთან ახლოს იპოვეს წერილი, სადაც საუბარია გასულ წელს, ბერლინში, საშობაო ბაზარზე თავდასხმასა და სირიაში მიმდინარე სამხედრო ოპერაციაზე. დოკუმენტის ავთენტურობა ჯერ დადგენილი არ არის.

11 აპრილს, გერმანიაში, საფეხბურთო კლუბ დორტმუნდის ბორუსიას ავტობუსის სიახლოვეს ასაფეთქებელი მოწყობილობა მაშინ ამოქმედდა, როდესაც კლუბი ჩემპიონთა ლიგის თამაშზე მიდიოდა. კლუბის მიერ გავრცელებული ინფორმაციით, დაშავებულია მხოლოდ ერთო ფეხბურთელი მარკ ბარტრა, რომელიც საავადმყოფოში გადაიყვანეს, სხვები კი უსაფრთხოდ არიან.

დორტმუნდის პოლიციის ცნობით, სულ სამი აფეთქება იყო, რომელთა მიზეზი ჯერჯერობით უცნობია.

დორტმუნდის ბორუსიას ჩემპიონთა ლიგის მეოთხედ ფინალში ფრანგულ მონაკოსთან უნდა გაემართა მატჩი. კლუბმა ტვიტერის გვერდზე დაწერა, რომ თამაში 12 აპრილამდე გადაიდო.