ჯანდაცვის მინისტრის მოადგილის, თამარ გაბუნიას განცხადებით, ვაქცინის ბუსტერ დოზა კორონავირუსისგან დაცვის ეფექტს აორმაგებს. ამის შესახებ მან საკოორდინაციო საბჭოს დასრულების შემდეგ განაცხადა.

მისივე თქმით, იმ პირების დიდი ნაწილი, ვისაც ომიკრონის შტამი დაუდასტურდა, ვაქცინირებული იყო, რის გამოც, მათი ჰოსპიტალიზაციის მაჩვენებელი ძალიან დაბალია.

"ვაქცინირებულებში ჰოსპიტალიზაციის მაჩვენებელი მინიმალურია, პრაქტიკულად არ არის, რაც კიდევ ერთხელ მიუთითებს იმას, რომ ომიკრონის წინააღმდეგაც ვაქცინაციის ეფექტურობა მნიშვნელოვანია, განსაკუთრებით ჰოსპიტალიზაციის და მძიმე შემთხვევების თავიდან აცილების კუთხით.

კიდევ ერთხელ მინდა ხაზგასმით ვთქვა, ბუსტერ დოზის აუცილებლობის შესახებ. ბუსტერ დოზა თითქმის აორმაგებს ვაქცინაციის ეფექტს, დამცველობით ეფექტს, ამდენად მნიშვნელოვანია ბუსტერ დოზების გაკეთების გააქტიურება", — განაცხადა მან.

18 იანვრის მონაცემებით, საქართველოში კორონავირუსის 7 521 ახალი შემთხვევა დადასტურდა, გამოჯანმრთელდა 3 160, ხოლო გარდაიცვალა — 31 ადამიანი.

ბოლო 24 საათში ქვეყნის მასშტაბით ჩატარდა 56 367 კვლევა ტესტით, მათ შორის ანტიგენის სწრაფი ტესტით — 38 892, ხოლო PCR-ით — 17 475.

რაც შეეხება დადებითობის დღიური მაჩვენებელს, არის 13,34%, ბოლო 7 დღის — 10%, ხოლო 14 დღის — 10,26%.