პრემიერმინისტრის, ირაკლი ღარიბაშვილს განცხადებით, მათი სურვილია, რომ საქართველოში სპეციალური, საერთაშორისო ფინანსური ზონები შეიქმნას. მისი თქმით, ფინანსური ცენტრების ჩამოყალიბება თბილისის ზღვასთან და გონიოში იგეგმება. ამის შესახებ მან მთავრობის სხდომაზე ისაუბრა.

ღარიბაშვილი ვარაუდობს, რომ მათი შექმნა ხელს შეუწყობს ინვესტიციების მოზიდვას, ახალი სამუშაო ადგილების შექმნას, თანამედროვე, ფინანსური, ტექნოლოგიური სიახლეების გაზიარებასა და ქვეყნის რეგიონულ, ფინანსურ ცენტრად ჩამოყალიბებას.

"ეს უნდა იყოს ჩვენი საერთო საბოლოო მიზანი. გვაქვს ორი იდეა, ესე იგი, ორი ფინანსური ცენტრი შექმნის იდეა. ერთი, რომ შეიქმნას თბილისის ფინანსური ცენტრი თბილისის ზღვასთან, 110 ჰექტარი მიწის ფართობზე განთავსდება, სავარაუდოდ, ჩვენი სურვილისამებრ და ქვეყნის და რეგიონის გამორჩეული ცენტრი გახდეს აღნიშნული ადგილი.

ანალოგიური ჩამოყალიბება იგეგმება აჭარაში, გონიოს ტერიტორიაზე. გონიოში ჩვენ უფრო მულტიფუნქციური ცენტრის შექმნას ვგეგმავთ, მოგეხსენებათ, ამაზე უკვე დავიწყეთ აქტიური მუშაობა და აქვე გვინდა, რომ შევქმნათ ფინანსური ცენტრი", — განაცხადა მან.

როგორც პრემიერმინისტრი აღნიშნავს, სპეციალური ფინანსური ზონები საერთაშორისო კომპანიებს საერთო სამართლის პრინციპებზე დაფუძნებულ სამართლებრივ რეჟიმს, ასევე, საუკეთესო საერთაშორისო პრაქტიკაზე დაფუძნებულ ლიბერალურ, რეგულატორულ და ფისკალურ რეჟიმებს შესთავაზებენ.

"რაც მთავარია, ფინანსურ ზონებში მოქმედი საერთაშორისო კომპანიების პერსონალის მნიშვნელოვანი ნაწილი საქართველოს მოქალაქეები იქნებიან, რაც მათ განსაკუთრებული პროფესიული და კარიერული განვითარების საშუალებას მისცემს.

ჩვენი გათვლებით, სპეციალური ფინანსური ზონების შექმნა მნიშვნელოვნად შეუწყობს ხელს საქართველოს, როგორც განვითარებული, საფინანსო ინფრასტრუქტურის მქონე ქვეყნის პოპულარიზებას რეგიონსა და მსოფლიოში და საქართველო გახდება, ეს ჩვენი სურვილია, მიზანია, რეგიონული ფინანსური ცენტრი", — თქვა ღარიბაშვილმა.

მან ეკონომიკის მინისტრს, ნათია თურნავას საკანონმდებლო ცვლილებების პაკეტის მომზადება და საქართველოს მთავრობისთვის წარდგენა დაავალა. ამასთან, ღარიბაშვილმა აღნიშნა, რომ ფინანსური ცენტრების შესაქმნელად ფინანსურ ჯგუფთან, Rothschild & Co-თან კონტრაქტი უკვე გააფორმეს. მისი თქმით, კომპანიის დელეგაცია საქართველოს ერთ კვირაში ეწვევა და აქტიური მუშაობა დაიწყება.