1941 წელს 21 წლის რონი და 19 წლის ჯოისი დაქორწინდნენ. მათი თქმით, ერთმანეთი პირველი დანახვისთანავე შეუყვარდათ, თუმცა წყვილის მეგობრები ასე არ ფიქრობდნენ და ისიც კი უთხრეს, რომ მალევე დაშორდებოდნენ. 4 იანვარს 102 წლის რონმა და 100 წლის ჯოისმა ქორწინების 81 წლის იუბილე აღნიშნეს.

"არ ველოდით, რომ ქორწინების 81 წლის იუბილეს ვიზეიმებდით. ძალიან გაგვიმართლა, რომ ასეთ საოცარ მიზანს მივაღწიეთ. ძალიან მაგარია! ჩვენს ურთიერთობაში უფროსი არ არსებობს", — ამბობს 100 წლის ჯოისი.

"ხანდახან ცხოვრება რთულია, მაგრამ სირთულეების დაძლევას ერთად ვცდილობთ. ერთმანეთზე ვზრუნავთ", — ამატებს 102 წლის რონი.

ფოტო: EXTRACARE / SWNS

ფოტო: EXTRACARE / SWNS

რონისა და ჯოისის სიყვარულის ისტორია უყურადღებოდ არც დიდი ბრიტანეთის დედოფალს დაუტოვებია. დედოფალმა ელიზაბეთმა შარშან წყვილს წერილი გაუგზავნა და ქორწინების 80 წლის იუბილე მიულოცა:

"რა საოცარია იმის გაგება, რომ 2021 წლის 4 იანვარს თქვენი ქორწინების 80 წლის იუბილეა. იმედი მაქვს, ამ საოცარი მოვლენით ისიამოვნებთ", — ვკითხულობთ დედოფლის წერილში.

რონი და ჯოისი დიდ ბრიტანეთში ყველაზე ხანგრძლივი ქორწინების მქონე წყვილია. მათი სიყვარულის ისტორიით უცხო ადამიანებთან ერთად ოჯახის წევრებიც აღფრთოვანებულნი არიან:

"ჩემი მშობლები შთამაგონებელი წყვილია არა მხოლოდ ჩემთვის და ჩემი ძმისთვის, არამედ მათი შვილიშვილებისთვის, შვილთაშვილებისა და შვილთაშვილის შვილებისთვისაც. მათთან დროის გატარება საკმარისია იმის მისახვედრად, რომ 81-წლიანი ქორწინების შემდეგაც კი უყვართ და ზრუნავენ ერთმანეთზე", — ამბობს წყვილის შვილი.

მართლაც, ვინ არ აღფრთოვანდებოდა ასეთი სიყვარულის ისტორიით? ჯოისისა და რონის ქორწინების შესახებ მშვენიერი ფილმის გადაღებაც შეიძლება!