ფინანსთა მინისტრი, ლაშა ხუციშვილი ამტკიცებს, რომ ქვეყანაში პოლტიკური პროცესი დასტაბილურებულია. ექსპრეზიდენტ მიხეილ სააკაშვილზე დასმული კითხვის საპასუხოდ მან განაცხადა, რომ ერთი ადამიანის ციხეში ყოფნა-არყოფნაზე არ არის დამოკიდებული პოლიტიკური სიმშვიდე.

"ის, რომ პოლიტიკური პროცესი არის დასტაბილურებული, ეს სახეზეა ისედაც. კონკრეტული ადამიანი — რომელსაც უკვე არამხოლოდ ბრალი აქვს წაყენებული, არამედ შესაბამისი სასამართლო გადაწყვეტილება არის გამოტანილი — იქნება ციხეში თუ არ იქნება ციხეში, ბუნებრივია ამაზე არ არის დამოკიდებული პოლიტიკური პროცესის მიმართულებით იქნება სიმშვიდე თუ არა", — განაცხადა ლაშა ხუციშვილმა.

გორის სამხედრო ჰოსპიტალიდან რუსთავის ციხეში გადაყვანის შემდეგ მიხეილ სააკაშვილმა ულტიმატუმი წამოაყენა: ის ითხოვს ადვოკატებთან კონფიდენციალურად საუბრის შესაძლებლობას და ექიმის შეშვებას ციხეში. თავდაპირველად მან ულტიმატუმის ვადად 6 იანვარი განსაზღვრა, თუმცა შემდეგ დრო თვის ბოლომდე გადაწია. ექსპრეზიდენტის ადვოკატის, შოთა თუთბერიძის განცხადებით, მოთხოვნების შეუსრულებლობის შემთხვევაში ის პროტესტის უკიდურეს ფორმებს მიმართავს, მათ შორის, შესაძლოა, შიმშილობასაც.