ქართული ოცნების დეპუტატის, ნინო წილოსანის შეფასებით, ექსპრეზიდენტ მიხეილ სააკაშვილის მიერ ე.წ. შავი სიის შექმნის იდეა აჩვენებს, რომ შერიგების შესახებ ინიციატივა არ იყო რეალური. მისი თქმით, მსგავსი სია თუ შეიქმნა, იქნება მიკერძოებული.

"ეს შავი სია იქნება ძალიან მიკერძოებული და პოლიტიკური დევნის საფუძველი. სწორედ ამ პრაქტიკას ახორციელებდნენ ისინი, როცა ხელისუფლებაში იყვნენ და დღემდე ვერ აცნობიერებენ, რომ ყველა ის პოლიტიკური ბრალეულობა, რომელსაც მათ წინაშე საზოგადოება აყენებს, სწორედ ამ არასწორი ნაბიჯებიდან გამომდინარე იყო.

რაც შეეხება მის ამ იდეის გაჟღერებას, ის კიდევ ერთხელ გვაჩვენებს, რომ ეროვნული თანხმობა თუ შერიგება იყო მხოლოდ და მხოლოდ დროებითი ხრიკი, რომელსაც ისინი მიმართავდნენ მხოლოდ და მხოლოდ იმისთვის, რომ დალაგებული სახე ეჩვენებინათ. თუმცა, საერთო სურათში ჩვენ ვხედავთ, რომ ნაციონალური მოძრაობა მიხეილ სააკაშვილის ლიდერობით, რა თქმა უნდა, არის ძალიან აგრესიული და მავნებელი პარტია", — განაცხადა წილოსანმა.

მიხეილ სააკაშვილი ადამიანის უფლებათა დამრღვევთათვის და კორუფციონერებისთვის ე.წ. შავის სიის შექმნის იდეით გამოდის. ექსპრეზიდენტი საზოგადოებას იურისტთა ჯგუფის შექმნას სთავაზობს, რომელიც, მისი თქმით, დანაშაულის შემადგენლობას გამოიკვლევს, მტკიცებულებებს შეაგროვებს და საჯაროდ გამოაქვეყნებს.

მისივე ინიციატივის მიხედვით, ე.წ შავს სიაში მოხვედრილი ადამიანებისთვის საელჩოებმა ვიზები არ უნდა გასცენ და მათთვის პერსონალური სანქციები უნდა დააწესონ. სააკაშვილი ფიქრობს, რომ ამ იდეით მათ დასავლეთის საელჩოებს უნდა მიმართონ.

სააკაშვილის აზრით, იმ მოსამართლეებს, პროკურორებსა თუ თანამდებობის პირებს, ვინც უსამართლობა ჩაიდინა, მოქალაქეები ქუჩაში უნდა სცნობდნენ და "შესაბამისი რეაგირება ჰქონდეთ". ამასთან ექსპრეზიდენტი დასძენს, რომ უნდა შეიქმნას სპეციალური საიტი, სადაც მათი საბრალდებლო დასკვნა დაიწერება.
გაიგეთ მეტი: მიხეილ