პარლამენტის თავმჯდომარის, შალვა პაპუაშვილის განცხადებით, მას საკანონმდებლო ორგანოს თავმჯდომარეობის კანდიდატად წარდგენა ქართული ოცნების თავმჯდომარემ, ირაკლი კობახიძემ შესთავაზა. პაპუაშვილის თქმით, შემდეგ მას მხარი პოლიტსაბჭოსა და უმრავლესობის სხდომაზეც დაუჭირეს.

"რა თქმა უნდა, ეს იყო თავად პარტიის თავმჯდომარის, ირაკლი კობახიძის შემოთავაზება და ვერ გეტყვით სხვა კანდიდატები რამდენად განიხილებოდა ან არ განიხილებოდა, ეს მისი შემოთავაზება იყო. ჩვენ პოლიტსაბჭო გვქონდა და შემდეგ პოლიტსაბჭოზეც იქნა ეს განხილული, უმრავლესობის სხდომაზეც იქნა განხილული. ასე რომ, თავისთავად, ეს არის პარტიის თავმჯდომარის შემოთავაზება, რომელიც შემდეგ პოლიტიკურმა საბჭომ და საპარლამენტო უმრავლესობამ გაიზიარა", — განაცხადა მან პირველი არხის ეთერში.

29 დეკემბერს შალვა პაპუაშვილი პარლამენტის თავმჯდომარედ დაამტკიცეს. პარლამენტის თავმჯდომარეობის კანდიდატად ქართულმა ოცნებამ პაპუაშვილი მას შემდეგ წარადგინა, რაც პარტიის თავმჯდომარემ თქვა, რომ კახა კუჭავამ თანამდებობა დატოვა.