თვითმფრინავში არაკომფორტული მგზავრობა, ალბათ, ბევრს გამოუცდია, თუმცა უნდა ვაღიაროთ, რომ ამერიკიდან ისლანდიაში მიმავალი ქალის, სახელად მარისას გამოცდილებას ნამდვილად ვერაფერი შეედრება. ქალმა თვითმფრინავის ტუალეტში 5 საათი გაატარა.

20 დეკემბერს ისლანდიაში მიმავალ მარისას თვითმფრინავში ყელი ასტკივდა. მოგზაურობას მას თან სწრაფი ტესტი ჰქონდა წაღებული, ამიტომ სიმპტომის გამოვლენისთანავე თვითმფრინავის ტუალეტში შევიდა და ტესტი გაიკეთა. სამწუხაროდ, ტესტი დადებითი აღმოჩნდა, თუმცა საკუთარ თავთან ერთად მარისას კიდევ ერთი სადარდებელი ჰქონდა: თვითმფრინავში 150 ადამიანი იმყოფებოდა.

"თვითმფრინავში 150 ადამიანი მგზავრობდა და ყველაზე მეტად იმის მეშინოდა, რომ მათ ვირუსს გადავდებდი", — იხსენებს მარისა.

სხვების დასაცავად მარისამ გადაწყვიტა, თვითიზოლაციაში გადასულიყო. ერთადერთი იზოლირებული ადგილი კი თვითმფრინავის ტუალეტი აღმოჩნდა, სადაც მარისამ 5 საათი გაატარა.

მარისას ამ რთული 5 საათი გადატანაში ერთ-ერთი გამცილებელი დაეხმარა, რომელიც მის მდგომარეობას მუდმივად ამოწმებდა და მასთან საჭმელი და სასმელი მიჰქონდა. გამცილებელმა მარისას საჩუქრები კოვიდსასტუმროშიც კი გაუგზავნა, რათა მისი მარტოსული შობა ცოტათი მაინც გაეხალისებინა.

მარისამ ამ უცნაური გამოცდილების დასაფიქსირებლად ტიკტოკზე ტუალეტიდან ვიდეოც ატვირთა, რომელსაც 4 მილიონზე მეტი ნახვა აქვს.