სტოკჰოლმში განვითარებულ მოვლენებთან დაკავშირებით, საქართველოს საელჩომ შვედეთში აამოქმედა ცხელი ხაზი, რომლის ნომერია +46 723695428.

"საქართველოს მოქალაქეებს მოვუწოდებთ, თავი შეიკავონ ხალხმრავალ ადგილებში გადაადგილებისგან და საჭიროების შემთხვევაში დაუკავშირდნენ საელჩოს!“ - ნათქვამია საელჩოს განცხადებაში.

შვიდ აპრილს სამი ადამიანი ემსხვერპლა სტოკჰოლმში, ხალხის მასაში შევარდნილ სატვირთო ავტომობილს. შემთხვევა ქალაქის ცენტრალურ უბანში, საფეხმავლო ქუჩაზე მოხდა. გარდაცვლილთა გარდა, არიან დაშავებულებიც.

მედიასაშუალებებმა გაავრცელეს ინფორმაცია ერთი პირის დაკავების შესახებ, თუმცა, როგორც შვედეთის პოლიცია იუწყება, არავინ დაუკავებიათ.

როგორც მოგვიანებით გაირკვა, სატვირთო ავტომობილი შემთხვევამდე რამდენიმე საათით ადრე გაიტაცეს. გამტაცებელმა ავტომობილი ქვეითებს, შემდეგ კი მაღაზიის ვიტრინას დააჯახა.

შვედეთის პრემიერმინისტრის თქმით, ყველა ნიშანი მიუთითებს იმაზე, რომ ეს იყო ტერორისტული აქტი. სტოკჰოლმში დაიხურა მეტრო, მუშაობა შეაჩერა პარლამენტმაც.

თუ ოფიციალურად დადასტურდება, რომ აღნიშნული ფაქტი ტერაქტია, ეს იქნება მეექვსე მსგავსი შემთხვევა ბოლო ორ წელიწადში, რაც ტერორისტებმა მსოფლიოს სხვადასხვა ქვეყანაში განახორციელეს. პირველი ფაქტი 2016 წლის 14 ივლისს, ნიცაში მოხდა, რასაც 86 ადამიანი ემსხვერპლა, 300 კი დაშავდა. ტერორისტებმა მსგავს მეთოდს მიმართეს ოჰაიოში, ბერლინში, ლონდონში და ანტვერპენში.