ნაციონალური მოძრაობის თავმჯდომარე, ნიკა მელია სოციალურ ქსელში განცხადებას ავრცელებს, სადაც მათთვის, "ვინც კიდევ ვერ გაიგო" განმარტავს, რატომ მიიღო პარტიამ მასობრივი შიმშილობის გადაწყვეტილება. მელიას თქმით, ფაქტია, რომ მიხეილ სააკაშვილი არის პოლიტპატიმარი. ის ამბობს, რომ თუ "რეჟიმი" ბედავს ქვეყნის მესამე პრეზიდენტის "ტყვეობაში აყვანას" გაბედავს სხვა პოლიტიკური ლიდერების, მედიამენეჯერებისა თუ ზოგადად, ოპონენტების დაკავებას.

მისი თქმით, სასამართლოს სამართლიანობის იმედი რომ ჰქონდეთ, პროტესტის რადიკალურ ფორმას არ მიმართავდნენ, მაგრამ ფიქრობს, რომ "მურუსიძის სასამართლო რეჟიმის მათრახია და არა სასამართლო". მელია ხაზს უსვამს, რომ პროტესტი უნდა იყოს არაძალადობრივი — "სხვა შემთხვევაში 90-იანი წლების კატასტროფას დავუბრუნდებით". მისივე თქმით, მასობრივი შიმშილობის მიზანი საერთაშორისო თანამეგობრობისა და ქართული საზოგადოების გამოფხიზლებაა.

"არავის მოწყალებაზე არაა მიმართული შიმშილობა, არავის აქვს მოლოდინი, რომ "ბიძინას შევეცოდებით", შიმშილობის მიზანი — ზოგადადაც და ახლაც — არის გამოაფხიზლოს საერთაშორისო თანამეგობრობაც და ინდიფერენტული ძილიდან გამოიყვანოს ჩვენი საზოგადოებაც.

რა თქმა უნდა, შიმშილობა საბოლოო პოლიტიკური მიზნების მისაღწევად არაა საკმარისი. ეს მხოლოდ თვალსაჩინო უსამართლობის შესაწყვეტად გამოიყენება", — წერს მელია.

მისი თქმით, ყველა თავის გზას ირჩევს და მზადაა, მხარი დაუჭიროს სხვებს პროტესტის სხვა გზებში. თუმცა, აცხადებს, რომ მხარს ვერ დაუჭერს "საახალწლო სტრატეგიულ არაფრისკეთებას" იმ ადამიანების მხრიდან, რომლებიც იწუნებენ ნაციონალური მოძრაობის პროტესტის ფორმას.

მელია აცხადებს, რომ მასობრივი შიმშილობით არჩევნებს კი არ უარყოფენ, ცდილობენ დაიბრუნონ არჩევანს უფლება. ასევე, უნდათ "ქვეყანაში საპროტესტო ხმა გაძლიერდეს".

დასასრულს, მელია მიმართავს ოპოზიციონერ კოლეგებს:

"ზოგიერთს ოპოზიციაში ყოფნა ესმის მხოლოდ როგორც კოლეგა ოპოზიციონერების კრიტიკა და მუდმივად ექსპერტული პიედესტალიდან მოგვმართავს. ჩვენ არ ვართ პოლიტიკის ექსპერტები და კომენტატორები, რომლებიც გარედან უყურებენ პროცესებს — ჩვენ ყოველთვის ვიბრძვით და ვმოქმედებთ", — წერს ნაციონალური მოძრაობის თავმჯდომარე.

21 დეკემბერს მიხეილ სააკაშვილის მხარდამჭერ აქციაზე ნაციონალური მოძრაობის თავმჯდომარემ, ნიკა მელია მასობრივი შიმშილობა გამოაცხადა. მელიას ინფორმაციით, სააკაშვილის გათავისუფლების მოთხოვნით 300-მდე ადამიანმა დაიწყო შიმშილობა. 22 დეკემბერს, ნაციონალური მოძრაობის ერთ-ერთმა ლიდერმა, კობა ნაყოფიამ განაცხადა, რომ მოშიმშილეთა სიაში 180 ადამიანია დარეგისტრირებული, თუმცა ვარაუდობს, რომ ეს რიცხვი გაიზრდება.

გაიგე მეტი: