ნაციონალური მოძრაობის ერთ-ერთი ლიდერი, კობა ნაყოფიას თქმით მიხეილ სააკაშვილი აღფრთოვანებულია იმ ადამიანების თავგანწირვით, ვინც მისი გათავისუფლების მოთხოვნით მასობრივი შიმშილობა გამოაცხადა. გარდა ამის, ნაყოფია ამბობს, რომ ექსპრეზიდენტი მათ საკვები დანამატების მიღებისკენ მოუწოდებს.

"ის, ნამდვილად, სოლიდარობას უცხადებს იმ ადამიანებს, ვინც გუშინ შიმშილობა გამოაცხადა. აღფრთოვანებულია მათი თავგანწირვით. ამავე დროს, ის ზრუნავს მათზე და მოუწოდებს, რომ თავს გაუფრთხილდნენ. ის დანამატები მიიღონ, ელექტროლიტები, რომ მათ ჯანმრთელობის მდგომარეობა არ შეირყეს. ძალიან ნერვიულობს, განიცდის ამ ადამიანებზე. დარწმუნებულია, რომ ეს ბრძოლა აუცილებლად ჩვენი გამარჯვებით და ჩვენი ქვეყნის — რაც ყველაზე მთავარია — საქართველოს გამარჯვებით დასრულდება", — განაცხადა კობა ნაყოფიამ.

გუშინ, მიხეილ სააკაშვილის მხარდამჭერ აქციაზე ნაციონალური მოძრაობის თავმჯდომარემ, ნიკა მელია მასობრივი შიმშილობა გამოაცხადა. მელიას ინფორმაციით, სააკაშვილის გათავისუფლების მოთხოვნით 300-მდე ადამიანმა დაიწყო შიმშილობა. დღეს ნაყოფიამ განაცხადა, რომ მოშიმშილეთა სიაში 180 ადამიანია დარეგისტრირებული, თუმცა ვარაუდობს, რომ ეს რიცხვი გაიზრდება.

მიხეილ სააკაშვილის სოციალურ ქსელში წერილი გამოაქვეყნა, სადაც წერს, რომ თითოეული მოშიმშილე "ცოტნე დადიანის და სხვა ქართველი გმირების ტრადიციების გამგრძელებელია".

გაიგე მეტი: