ქართული ოცნების ერთ-ერთი ლიდერი, სოზარ სუბარი აცხადებს, რომ ექსპრეზიდენტ მიხეილ სააკაშვილის გათავისუფლების მოთხოვნით მოშიმშილეებს მაკდონალდსის გვერდით მოუწევთ შიმშილობა და თუ მოინდომებენ ჰამბურგერებს მიირთმევენ. მისივე თქმით, სააკაშვილი თანაგულნდელებს აშანტაჟებს და ეს ისეთივე შეცდომაა, როგორც "ქვეყანაში შემოპარვა".

"მიხეილ სააკაშვილიც უნდა მიხვდეს, რომ როგორი შეცდომაც იყო თავის დროზე ქვეყანაში შემოპარვა და იმის იმედად ყოფნა, რომ ასიათასობით ადამიანი გამოვიდოდა ქუჩაში და ბელადს ხელში ატაცებულს აიყვანდა თანამდებობაზე, ოლიმპზე, ისევ ის შეცდომაა ახლა, როცა აშანტაჟებს თანაგუნდელებს. [...] მაკდონალდსის გვერდით მოუწევთ მათ შიმშილობა და თუ მაინც მოინდომებენ მსუბუქი შიმშილობა ჰქონდეთ, ხბოს პაშტეტების ნაცვლად, რასაც მათი პრეზიდენტი მიირთმევდა, მიირთმევენ მაკდონალდსის ჰამბურგერებს", — აცხადებს ის.

21 დეკემბერს პარლამენტთან მიმდინარე აქციაზე ენმ-ის თავმჯდომარემ, ნიკა მელიამ ექსპრეზიდენტ მიხეილ სააკაშვილის გათავისუფლების მოთხოვნით უვადო, მასობრივი შიმშილობა დააანონსა. მელია ამბობს, რომ ამ გადაწყვეტილებას დაახლოებით 2 კვირის განმავლობაში განიხილავდა და ექსპრეზიდენტმა სააკაშვილმა არ იცოდა.

მელიამ განაცხადა, რომ მარტივად პროგნოზირებადია, თუ რას იტყვიან მმართველი გუნდის ლიდერები ენმ-ს მასობრივ შიმშილობაზე. მისი თქმით, ირაკლი კობახიძე და ირაკლი ღარიბაშვილი იმაზე დაიწყებენ ლაპარაკს, რომ მოშიმშილეები ხაჭაპურს და ფელამუშს ჭამენ.

მასობრივი საპროტესტო შიმშილობა კახეთის გზატკეცილზე, ერთიანი ნაციონალური მოძრაობის ოფისის მიმდებარე ტერიტორიაზე დაიწყო. მელიას განცხადებით, შიმშილობაში 300-ზე მეტი ადამიანი მიიღებს მონაწილეობას.