სულ ცოტა ხნის წინ ამერიკის კინოაკადემიამ 2022 წლის დაჯილდოების 10 კატეგორიაში ნომინანტთა მოკლე სია გამოაქვეყნა, მათ შორის საუკეთესო საერთაშორისო მხატვრული ფილმის ნომინაციაშიც და 15 რჩეულ კინოსურათს შორის, სამწუხაროდ, საქართველოს კანდიდატი ფილმი — მეოთხე ბრაიტონი ვერ მოხვდა.

ოსკარების რიგით 94-ე დაჯილდოებაზე 92 ქვეყანა იბრძოდა საუკეთესო საერთაშორისო ფილმის ნომინაციაში მოსახვედრად და ამჟამად უკვე 15 კანდიდატიდან შეირჩევა საბოლოო ფინალისტები.

აი, ასეთია წლევანდელი მოკლე სია:

  • ავსტრია — Great Freedom
  • ბელგია — Playground
  • ბუტანი — Lunana: A Yak in the Classroom
  • დანია — Flee
  • ფინეთი — Compartment No. 6
  • გერმანია — I’m Your Man
  • ისლანდია — Lamb
  • ირანი — A Hero
  • იტალია — The Hand of God
  • იაპონია — Drive My Car
  • კოსოვო — Hive
  • მექსიკა — Prayers for the Stolen
  • ნორვეგია — The Worst Person in the World
  • პანამა — Plaza Catedral
  • ესპანეთი — The Good Boss

ამ სიიდან საბოლოოდ ხუთი ფინალისტი შეირჩევა, რომელთა შესახებ 8 თებერვალს გახდება ცნობილი, როცა ყველა ნომინაციის კანდიდატი დასახელდება.

გამარჯვებულების გამოსავლენად კი ოსკარების რიგით 94-ე დაჯილდოება 2022 წლის 27 მარტს გაიმართება.

რაც შეეხება ქართულ ფილმს მეოთხე ბრაიტონი, ის წელს სპეციალური კომისიის გადაწყვეტილებით ჯამში სულ სამ კანდიდატ ფილმს შორის შეირჩა და ოსკარებზე საქართველოს სახელით გაიგზავნა.

აღსანიშნავია, რომ ლევან კოღუაშვილის ამ ახალმა მხატვრულმა ნამუშევარმა აქამდე არაერთ საერთაშორისო კინოფესტივალზე მიაღწია წარმატებას: ნიუ-იორკში შემდგარი მსოფლიო პრემიერის შემდეგ ფილმმა მეოთხე ბრაიტონი ტრაიბეკას კინოფესტივალზე სამ ნომინაციაში გაიმარჯვა: საუკეთესო ფილმის, საუკეთესო სცენარისა და ამავდროულად საუკეთესო მსახიობი კაცის ნომინაციაშიც ლევან თედიაშვილმა გაიმარჯვა. ასევე ეს ქართული კინოსურათი საუკეთესო ფილმად დასახელდა საუდის არაბეთის კინოფესტივალსა და აზიური ფილმების მსოფლიო ფესტივალზეც.

მეოთხე ბრაიტონი ამჟამად საქართველოს კინოთეატრებში გადის და შესაძლებლობა გაქვთ, თავად ნახოთ დიდ ეკრანზე და შეაფასოთ, რამდენად სამართლიანი იყო ამერიკის კინოაკადემიის გადაწყვეტილება.