მეოთხე ბრაიტონი — ასე ჰქვია რეჟისორ ლევან კოღუაშვილის ახალ სრულმეტრაჟიან ფილმს, რომლის მსოფლიო პრემიერაც ნიუ-იორკში, ტრაიბეკას საერთაშორისო კინოფესტივალზე შედგება.

მეოთხე ბრაიტონი ქართველი მოჭიდავის — კახის შესახებ გვიყვება, რომელიც ბრუკლინში აზარტული თამაშების გამო ვალების მქონე შვილის დასახმარებლად ჩადის. ფილმში კახის ქართველი მოჭიდავე, ოლიმპიური თამაშების ორგზის ჩემპიონი ლევან თედიაშვილი განასახიერებს. ერთ-ერთ მთავარ როლს მსახიობი კახი კავსაძეც შეასრულებს. ფილმის დამდგმელი ოპერატორი ფედონ პაპამაიკლია, რომელიც ოსკარზე ორჯერ იყო ნომინირებული.

ფოტო: IMDb

მეოთხე ბრაიტონის ძირითადი ნაწილი ნიუ-იორკში, ეროვნული კინოცენტრის მხარდაჭერითაა გადაღებული. ფილმი საქართველოს, ბულგარეთის, ამერიკის შეერთებული შტატებისა და რუსეთისა კოპროდუქციაა. მეოთხე ბრაიტონის ერთ-ერთი თანაპროდიუსერი საქართველოს საზოგადოებრივი მაუწყებელია, ხოლო თანადამფინანსებელი — საქველმოქმედო ფონდი ქართუ.

ტრაიბეკას საერთაშორისო კინოფესტივალი 9-20 ივნისს გაიმართება. ფესტივალზე 66 ფილმი იქნება წარმოდგენილი. კინოფესტივალზე გამარჯვებულები შემდეგ ნომინაციებში გამოვლინდებიან: საუკეთესო სრულმეტრაჟიანი მხატვრული ფილმი, საუკეთესო სცენარი, საუკეთესო ოპერატორული ნამუშევარი, საუკეთესო მსახიობი (მამაკაცი), საუკეთესო მსახიობი (ქალი).