საქართველოს პრემიერ-მინისტრი გიორგი კვირიკაშვილი ისურვებდა, რომ პრეზიდენტის გამოსვლა უფრო სიღრმისეული და ობიექტური ყოფილიყო. ასე შეაფასა კვირიკაშვილმა პრეზიდენტის ყოველწლიური მოხსენება პარლამენტში.

"ეს იყო ყოველწლიური ტრადიციული გამოსვლა, სადაც პრეზიდენტმა წარმოადგინა საკუთარი შეხედულებები მიმდინარე მოვლენების შესახებ. შემიძლია, გითხრათ, რომ მთელი რიგი მიმართულებები, როგორიც არის სასამართლო, ეკონომიკური განვითარება დემოკრატიის და დემოკრატიული ინსტიტუტების განვითარება ქვეყანაში არა მხოლოდ ჩვენი აზრით, არამედ ყველა ჩვენი მეგობრის, საერთაშორისოს აქტორების აზრით, საქართველოში არის შესამჩნევი პროგრესი," - აღნიშნა კვირიკაშვილმა.

საქართველოს პრეზიდენტი, გიორგი მარგველაშვილი დღეს, პარლამენტის პლენარულ სხდომაზე ყოველწლიური ანგარიშით წარსდგა. გამოსვლისას განაცხადა, რომ ეკონომიკური რეფორმების შემუშავება და დანერგვა ბიზნესთან კონსულტაციების გარეშე არ უნდა ხდებოდეს. პრეზიდენტი მიიჩნევს, რომ საჭიროა კონკურენციის კანონის უფრო ქმედითად ფორმულირება, აღსრულება და კონკურენციის სააგენტოს უფრო გააქტიურება. გარდა ამისა, მან ქვეყანაში არსებულ კრიმუნალურ მდგომარეობაზე, ე.წ. მოსმენების კანონზე და მედიაგარემოზე ისაუბრა.