ამერიკის შეერთებული შტატების ძირითადი მოკავშირეები მხარს უჭერენ მის მიერ სირიის სამხედრო ბაზის დაბომბვას.

ამერიკის შეერთებულმა შტატებმა სირიაში სამოქალაქო ომის დაწყებიდან ექვსი წლის შემდეგ პირველად, 7 აპრილს, საჰაერო იერიში მიიტანა სირიის მთავრობის სამხედრო ავიაბაზაზე ჰომსის პროვინციაში. როგორც აშშ-ს პრეზიდენტმა თქვა, ეს იყო პასუხი ასადის რეჟიმის მიერ 4 აპრილს, იდლიბის პროვინციაში მოსახლეობის წინააღმდეგ ქიმიური იარაღის გამოყენებაზე.

ავსტრალიამ, თურქეთმა, იაპონიამ, საუდის არაბეთმა, ისრაელმა და დიდმა ბრიტანეთმა მხარდაჭერა გამოუცხადეს აშშ-ს ასადის რეჟიმის წინააღმდეგ გადადგმულ ნაბიჯში.

დიდი ბრიტანეთის თავდაცვის მდივანმა, მაიკლ ფელონმა განაცხადა, რომ აშშ-ს ავიაიერიშის მიზანი იყო ბაშარ ალ ასადის ხელისუფლების შეჩერება, რათა მათ სამომავლოდ კიდევ ვერ შეძლოს ქიმიური იარაღის გამოყენება.

ნატოს გენერალურმა მდივანმა და საფრანგეთის საგარეო საქმეთა მინისტრმა კი თქვეს, რომ ისინი ინფორმირებულნი იყვნენ დაგეგმილი ავიაიერიშის წინააღმდეგ.

აშშ–ს "მსოფლიო მშვიდობისა და წესრიგის გარანტი" უწოდა პოლონეთმაც.

სირიის მთავრობის ინფორმაციით, ავიაიერიშს ემსხვერპლა ექვსი ადამიანი, დიდია მატერიალური ზიანიც.

ჯერჯერობით, მხოლოდ რუსეთმა და ირანმა დაგმეს აშშ-ს ქმედებები. სწორედ აღნიშნული სახელმწიფოები უჭერენ მხარს ასადის რეჟიმს სირიელი აჯანყებულების წინააღმდეგ ბრძოლაში.

რუსეთის ხელისუფლება თავიდანვე უარყოფდა, რომ სირიის მთავრობამ 4 აპრილს გამოიყენა ქიმიური იარაღი საკუთარი მოსახლეობის წინააღმდეგ. რუსი მაღალჩინოსნების თქმით, 7 აპრილის ავიაიერიში სირიულ სამხედრო ბაზაზე, "გააუარესებს აშშ-რუსეთის" ურთიერთობებს.

ტრამპის აღიშნული გადაწყვეტილება სირიის მთავრობაზე შეტევასთან დაკავშირებით მნიშვნელოვანია რამდენიმე მიზეზის გამო. პირველი ეხება მის საგარეო კურსს. ის მუდამ აცხადებდა, რომ აშშ არ უნდა ჩაერიოს სამხედრო ძალით სხვა ქვეყნის კონფლიქტებში. მეორე მნიშვნელოვანი ფაქტორი კი რუსეთია.

სწორედ რუსეთის ფედერაცია უმაგრებს ზურგს ასადის რეჟიმს და ეხმარება მას პირდაპირი სამხედრო ძალით აჯანყებულების წინააღმდეგ საბრძოლველად. რუსულმა ავიაციამ არაერთხელ დაბომბა სირიელი აჯანყებულთა პოზიციები.

სირიაში უკვე ექვსი წელია სამოქალაქო ომი მიმდინარეობს, სადაც საერთაშორისო აქტორებიც არიან ჩართულები.