"როგორ ფიქრობთ, აქ თქვენ განცხადების გარდა, რომ მიდიხართ თქვენი პოსტიდან, რამე სხვას უნდა გვეუბნებოდეთ საქართველოს პარლამენტში დღეს?" — ამ კითხვით მიმართა საქართველოს პარლამენტის წევრმა, სალომე სამადაშვილმა ეროვნული ბანკის პრეზიდენტს, კობა გვენეტაძეს პარლამეტში პლენარულ სხდომაზე.

სამადაშვილმა განაცხადა, რომ ქვეყანაში ინფლაციამ ბოლო 25 წლის მანძილზე მაქსიმალურ ნიშნულს მიაღწია.

"25 წლის მანძილზე ჩვენს ქვეყანაში ინფლაციამ მიაღწია მაქსიმალურ ნიშნულს და თქვენ კომიტეტის სხდომაზე მითხარით, რომ ეს სიმართლე არ არის. თქვენს იმეილს თუ მომცემთ, გადმოგიგზავნით ცხრილს იმიტომ, რომ უცნაურია, ეროვნული ბანკის პრეზიდენტს არ აქვს მონაცემები გასული 25 წლის მანძილზე, დეკემბრიდან დეკემბრამდე ინფლაცია სადამდე ადიოდა ჩვენს ქვეყანაში.

მე მინდა გითხრათ, რომ მონაცემების თანახმად, 1996 წელს გვქონდა ჩვენ ინფლაცია 13,8%, დღევანდელი მონაცემებით, ასულია უკვე 12,5%-ზე, რაც არის ისტორიული მაქსიმუმი 25 წლის მანძილზე და თქვენ გვეუბნებით, რომ ინფლაცია კიდევ გაიზრდება დეკემბრის ბოლომდე. ამიტომ 25 წლის მანძილზე რეკორდულ ინფლაციას რომ მიაღწევს ქვეყანაში წლიდან წლამდე, დეკემბრიდან დეკემბრამდე, როგორ ფიქრობთ, აქ თქვენ განცხადების გარდა, რომ მიდიხართ თქვენი პოსტიდან, რამე სხვას უნდა გვეუბნებოდეთ საქართველოს პარლამენტში დღეს?", — თქვა დეპუტატმა.

მან, ასევე, თქვა, რომ ჯაფარიძე-ხაზარაძის საქმესთან დაკავშირებით ეროვნული ბანკის პრეზიდენტი ქვეყანაში პირველად პოლიტიკური დევნის ინსტრუმენტი გახდა.

"მე ვფიქრობ, რომ დღევანდელი მოხსენების კიდევ ერთხელ მოსმენის შემდეგ საქართველოს პარლამენტში, ალბათ, აქტუალური იქნება შეკითხვა, რომელიც შეიძლება, თქვენთან ვინმეს ჰქონდეს, ის შეკითხვაა, რომელიც ჩემმა კოლეგამ, ბატონმა ბადრი ჯაფარიძემ კომიტეტის სხდომაზე უკვე დაგისვათ, როდის აპირებთ, რომ გადადგეთ, მაგრამ სამწუხაროდ, დღეს ბატონი ბადრი ვერ ესწრება სხდომას, მათ შორის, თქვენი არც თუ მცირე წვლილის შედეგად ის იძულებულია, რომ ესწრებოდეს სასამართლო სხდომას, რომელიც მიმდინარეობს მისი და მამუკა ხაზარაძის წინააღმდეგ. კიდევ ერთხელ ვამბობ, სრულიად უპრეცედენტოა ამ საქმეში თქვენი როლი, როდესაც პირდაპირ ეროვნული ბანკის პრეზიდენტი გახდა ჩვენს ქვეყანაში პირველად პოლიტიკური დევნის ინსტრუმენტი და ბადრის ნაცვლად მე გისვამთ კიდევ ერთხელ ამ შეკითხვას, როდის აპირებთ, რომ გადადგეთ", — თქვა პარლამენტის წევრმა.