ლელოს ერთ-ერთი ლიდერი, მამუკა ხაზარაძე აცხადებს, რომ მისთვის ნაკლებად მნიშვნელოვანია, თუ რა გადაწყვეტილებას მიიღებს დღეს სასამართლო.

"ჩემთვის ეს სასამართლო რა გადაწყვეტილებას მიიღებს ნაკლებად მნიშვნელოვანია, უფრო მეტად მნიშვნელოვანია, რომ ახალგაზრდებმა, რომლებიც ამას უყურებენ, არ დაკარგონ იმედი ამ ქვეყანაში, რომ შეიძლება პატიოსნად, შრომით, მიზანდასახულად, რაც ყველაზე მნიშვნელოვანია, გამჭვირვალედ მიაღწიო წარმატება", — განაცხადა მან ჟურნალისტებთან პროცესზე შესვლამდე.

ხაზარაძის თქმით, პროცესი ამდენი წლის განმავლობაში იმიტომ გაიწელა, რომ ქვეყანაში წარმატებას ებრძვიან.

"ეს არ არის პროცესი იმის გასარკვევად, თუ რა მოხდა იმიტომ, რომ ამის გარკვევა პირველი კურსის იურიდიული ფაკულტეტის სტუდენტსაც შეუძლია იმიტომ, რომ არაფერი სირთულე და მით უმეტეს, სამწლიანი გამოკვლევა ამას არ სჭირდებოდა, ამიტომ მე დღეს არ დავიწყებ არც დასკვნით სიტყვაში და არც თქვენთან, მეგობრებო, იმის ახსნას იმიტომ, რომ ყველამ ძალიან კარგად იცით, ერთხელ და საბოლოოდ ვიტყვი, რომ არანაირი დარღვევა, არათუ ფულის გათეთრება, ამ საქმეში არ ყოფილა.

აქ სხვა რამესთან გვაქვს საქმე, რატომ გაიწელა ეს ყველაფერი სამი წელი? გაიწელა იმიტომ, რომ აქ ებრძვიან წარმატებას, ამ ქვეყანაში, აქ ებრძვიან იმას, რომ ქართველებს არ შეუძლიათ წარმატებული საქმის კეთება და თუ გამოუვიდათ ეს საქმე, აუცილებლად იქ უნდა იყოს დანაშაული, დარღვევა ან ვიღაცის დახმარება", — თქვა ლელოს ერთ-ერთმა ლიდერმა.

დღეს, 16 დეკემბერს თბილისის საქალაქო სასამართლოში ე.წ. ფულის გათეთრების საქმეზე ბოლო სასამართლო პროცესი გაიმართება.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭვირვალობაზე.

გარდა ამისა, თიბისი ბანკმა ეროვნული ბანკის წინააღმდეგ სასამართლო დავა შეწყვიტა და განაცხადა, რომ მილიონიან ჯარიმას გადაიხდის. ამასთანავე, ბადრი ჯაფარიძე და მამუკა ხაზარაძე ეროვნული ბანკის წინააღმდეგ კერძო დავას აგრძელებენ.

თიბისი გრუპის 97%-მა ხაზარაძე და ჯაფარიძე ხელახლა აირჩია თავმჯდომარედ და მოადგილედ.

28 ივნისს გავრცელდა ინფორმაცია, რომ თიბისი ბანკის დამფუძნებლები მამუკა ხაზარაძე და ბადრი ჯაფარიძე თიბისის აქციების დაახლოებით 8%-ს დროებით გასხვისებას აპირებენ. ამის შესახებ განცხადება ლონდონის საფონდო ბირჟაზე გამოქვეყნდა.

9 ივლისს მამუკა ხაზარაძემ განაცხადა, რომ აფუძნებს საზოგადოებრივ მოძრაობას. ხაზარაძის ინფორმაციით, მეგობრებთან და თანამოაზრეებთან, სხვადასხვა სფეროს პროფესიონალებთან ერთად სექტემბერში დააფუძნებს და მთავარი მიზანი ქვეყნის გაერთიანება და მისი დამოუკიდებლობის და თავისუფლების შენარჩუნება იქნება.

ამის შემდეგ პროკურატურამ ბადრი ჯაფარიძესა და მამუკა ხაზარაძეს ფულის გათეთრების ბრალდება წაუყენა. 26 ივლისს თბილისის საქალაქო სასამართლომ ფულის გათეთრების საქმეზე თიბისი ბანკის დამფუძნებლების მამუკა ხაზარაძისა და ბადრი ჯაფარიძის აღკვეთ ღონისძიებაზე იმსჯელა. სასამართლო თითოეულ მათგანს 700 ათასი ლარის გირაო შეუფარდა და ქვეყნიდან გასვლა შეუზღუდა.

მილიონ-მილიონ ლარის შეფარდების შუამდგომლობით სასამართლოს ბრალდების მხარემ მიმართა. დაცვის მხარე კი ბრალდებულებისთვის არასაპატიმრო აღკვეთის ღონისძიების გამოყენებას ითხოვდა.

გაიგეთ მეტი: