აქტივისტი სამირა ბაირამოვა, მარნეული-ბოლნისის გზაზე მომხდარ საავტომობილო შემთხვევის შესახებ, რომელსაც ორი ახალგაზრდას სიცოცხლე ემსხვერპლა მის ხელთ არსებულ ინფორმაციას გვიზიარებს.

ბარიამოვა ადგილობრივებზე დაყრდნობით ამბობს, რომ მანქანაში მყოფი ორი პირი ნასვამ მდგომარეობაში იმყოფებოდა, რის გამოც მოხდა უბედური შემთხვევა.

"როგორც ადგილობრივებმა მითხრეს, მანქანა ძალიან სწრაფად მოდიოდა, ნასვამ მდგომარეობაში ყოფილან და შესაბამისად ვერ გააკონტროლეს თავი. ერთი ბიჭი ადგილზე გარდაიცვალა, ერთი საავადმყოფოში წაყვანის დროს. კიდევ ორი პირი არის სტაბილურ მდგომარეობაში", — ამბობს სამირა ბაირამოვა NEWS.On.ge-სთან.

აქტივისტის თქმით, მანქანაში მყოფმა პირებმა, ადგილობრივებს სიტყვიერი შეურაცხყოფა მიაყენეს, ხოლო მოგვიანებით შემთხვევის ადგილიდან გაიქცნენ.

ამასთან, ბაირამოვა NEWS.On.ge-სთან აღნიშნავს, რომ როდესაც სასწრაფო დახმარება მოვიდა, პირველადი დახმარების გასაწევად მანქანაში მყოფ პირებთან მივიდნენ, რამაც ადგილზე თავმოყრილი ადგილობრივების გაბრაზება გამოიწვია და სასწრაფოს მანქანა გადააყირავეს.

"[მძღოლმა] მანქანა დატოვა და გაიქცა, ასევე ადგილზე მყოფ პირებს შეაგინა, ამიტომ ადგილობრივები გაბრაზდნენ და მანქანა გადააყირავეს. როდესაც ადგილზე მოვიდა სასწრაფო, დაზარალებულს კი არა, მანქანაში, ნასვამ მდგომარეობაში მყოფ პირებთან მივიდა პირველადი დახმარების გასაწევად, რაზეც მოსახლეობა გაბრაზდა და გადაატრიალეს სასწრაფოს მანქანა — რაც არასწორი ქცევა არის, ისინი რა შუაში არიან. ადგილზე მობილიზებულა დიდი რაოდენობით პოლიციელები და სპეცრაზმელები, ნიღბიანები, სავარაუდოდ სპეცრაზმელები არიან", — აღნიშნავს ბაირამოვა NEWS.On.ge-სთან ინტერვიუში.