სახალხო დამცველის, ნინო ლომჯარიას განცხადებით, ექსპრეზიდენტმა, მიხეილ სააკაშვილმა ამ დრომდე ვერ მიიღო საჭირო ფსიქოთერაპიული დახმარება, რამაც ბევრი რამ გაართულა. მისი თქმით, ეს დამხარება რომ შეეთავაზებინათ, შესაძლებელია, სხვა მხრივაც უფრო მეტი წინსვლა ყოფილიყო. ლომჯარია განმარტავს, რომ მისი ეგიდით შექმნილმა კონსილიუმმა ამის საჭიროებაზე ჯერ კიდევ 25 ნოემბერს ისაუბრა, თუმცა არ შესრულდა.

"განმეორებითმა მონიტორინგმა დაადასტურა, რომ კონსილიუმის მიერ პირველ შემოწმებაზე, ანუ გორში ჩატარებული შემოწმების დროს გაცემული რეკომენდაცია ფსიქოთერაპიის დაწყებასთან დაკავშირებით არ შესრულდა, რამაც ფაქტობრივად შეგვიძლია ვთქვათ, რომ დღეს კიდევ უფრო დაამძიმა. [...]

მთავარი დასკვნა ალბათ არის ის, რომ როგორც თავად ფსიქიატრიც საუბრობს, თუ დღესვე არ დაიწყო ჩარევა, ანუ დახმარება შესაბამისი თერაპიის და სწორი მედიკამენტოზური მკურნალობის, მოსალოდნელია კიდევ უფრო გართულება ვითარების, სადაც ჩვენ არ გვინდა რომ მივიდეთ", — განაცხადა მან TV პირველის ეთერში.

სახალხო დამცველის შექმნილმა კონსილიუმმა მიხეილ სააკაშვილის ჯანმრთელობის მდგომარეობაზე დასკვნა გამოაქვეყნა. მათი განცხადებით, სააკაშვილს პოსტტრავმული სტრესული აშლილობა და დეპრესია აქვს. ასევე, გამოხატულია ანემია, ხოლო ნევროლოგიური სიმპომატიკიდან რჩება გარკვეული პათოლოგია — მზერის პარეზი, წონასწორობის დარღვევა, ზოგადი სისუსტე.

ექსპერტთა ჯგუფი მიიჩნევს, რომ არასაკმარისი სიმძლავრით მიმდინარეობს ფიზიკური რეაბილიტაცია და მკურნალობის ამ რგოლს, შესაძლოა, ხელი შეუწყოს ფსიქოთერაპიის დროულმა დაწყებამ.

კონსილიუმის წევრებს ჟურნალისტებმა ექსპრეზიდენტის შესაძლო ფარმაკოლოგიურ წამებაზეც ჰკითხეს. ექიმებმა განაცხადეს, რომ ამის ნიშნებს ვერ ხედავენ და დანიშნულების მიხედვით ფსიქოტროპული მედიკამენტები სააკაშვილს ჭარბად არ მიუღია. მათივე თქმით, ამას სჭირდება გამოკვლევა. როგორც ექიმმა აღნიშნა, ერთ-ერთ კონსილიუმში მას მისცეს ისეთი დოზა, რომელსაც არ ეთანხმებიან, თუმცა ესეც თერაპიულ სიგანეში ჯდებოდა და არ იყო ტოქსიური დოზით.

სახალხო დამცველის მიერ შექმნილმა ექსპერტთა/სპეციალისტთა ჯგუფმა სააკაშვილი 12 დეკემბერს მოინახულა. ეს მათი მეოთხე ვიზიტი იყო. ვიზიტში მონაწილეობა მიიღეს ექსპერტებმა: აიდა გოზალოვამ, თენგიზ წულაძემ, გიორგი კაჭარავამ, ნინო ზავრაშვილმა, გრიგოლი ხურციძემ, გიორგი პაპიაშვილმა, გიორგი გრიგოლიამ და მარინე კურატაშვილმა.