სამხრეთ კავკასიასა და ცენტრალურ აზიაში NATO-ს გენერალური მდივნის სპეციალურმა წარმომადგენელმა, ხავიერ კოლომინამ ტვიტერზე დაწერა, რომ როგორც რიგაში NATO-ს საგარეო საქმეთა მინისტრებმა თქვეს, ისინი 2008 წლის ბუქარესტის სამიტზე მიღებული გადაწყვეტილების ერთგულები რჩებიან.

"რუსეთს სურს ისეთ ქვეყნებს, როგორიცაა უკრაინა და საქართველო უკარნახოს ის, თუ რა გადაწყვეტილებას მიიღებენ საკუთარ მომავალთან დაკავშირებით. როგორც NATO-ს საგარეო საქმეთა მინისტრებმა რიგაში განაცხადეს, ჩვენ 2008 წელს ბუქარესტის სამიტზე მიღებული გადაწყვეტილების ერთგულები ვრჩებით", — წერს ის.

NATO-ს გენერალური მდივანი იენს სტოლტენბერგი რუსეთის საგარეო უწყების მიერ 10 დეკემბერს გაკეთებულ განცხადებას გამოეხმაურა, რომლის თანახმად რუსეთი "აუცილებლად მიიჩნევს NATO-ს 2008 წლის ბუქარესტის სამიტის გადაწყვეტილების — რომ საქართველო და უკრაინა NATO-ს წევრები გახდებიან, გაუქმებას". სტოლტენბერგის განცხადებით, ალიანსის პოზიცია უცვლელი რჩება.