ბრიტნი სპირსს სასამართლომ ხელის მოწერის უფლება 13 წლის შემდეგ დაუბრუნა

ბრიტნი სპირსის 13-წლიანი მეურვეობისგან გათავისუფლდა, მაგრამ სასამართლო პროცესი ისევ გრძელდება. ბოლო პროცესზე მოსამართლემ ბრიტნის სპირსს მიანიჭა უფლება, რომ დოკუმენტებზე ხელი თავად მოაწეროს, რადგან მას უკვე "უფლება აქვს ის გააკეთოს, რაც სურს".

მიუხედავად იმისა, რომ ბრიტნი მეურვეობისგან თავისუფალია, მის ბუღალტერს სასამართლოს შემდეგ მოსმენდამდე ქონებასთან დაკავშირებულ საკითხებზე გადაწყვეტილების მიღების უფლება ისევ აქვს, თუმცა ამ შუამდგომლობის საკითხს, სავარაუდოდ, ბრიტნის სასარგებლოდ შეცვლიან.

ბრიტნის სპირსის მამა მოსმენას სატელეფონო კავშირის მეშვეობით დაესწრო და შვილის ქონებაზე წვდომის უფლება მოითხოვა. ეს ბრიტნის ადვოკატმა მაშინვე გააპროტესტა, რადგან "ნორმალურ სიტუაციაში ადამიანს არასდროს მოუწევს სხვას თავის ქონებაზე წვდომის უფლება გაუზიაროს, იქნება ეს ოჯახის წევრი, მეგობარი თუ სხვა".

შეგახსენებთ, რომ ბრტინი მამის მეურვეობის ქვეშ 13 წელი იმყოფებოდა, რომელიც მომღერლის ფინანსებსაც განაგებდა. სიტუაცია მას შემდეგ შეიცვალა, რაც ბრიტნი საჯაროდ ალაპარაკდა მეურვეობის ქვეშ ცხოვრებაზე და ახლობლები დაადანაშაულა, რომ ამას ბოროტად იყენებდნენ. მამის წინააღმდეგ ბრალდებებს შორის კი ერთ-ერთია სათვალთვალო კამერებით შვილის საუბრების მოსმენა, რასაც ჯეიმი სპირსი უარყოფს.

ბრიტნის ადვოკატმა განაცხადა, რომ მეურვეობის პერიოდში ჯეიმი სპირსმა შვილის ქონებიდან 4 მლნ დოლარი აიღო. ადვოკატი ასევე ამტკიცებს, რომ მეურვეობაში მონაწილე სხვა პირები ბრიტნის შემოსავლის დიდ ნაწილს თავად ხარჯავდნენ.

როგორც ბრიტნის ადვოკატი აღნიშნავს, ჯეიმი სპირსმა ვერ შეძლო იმ დოკუმენტებისა და მტკიცებულებების წარმოდგენა, რომელიც მის ქცევას ნათელს მოჰფენდა და დაამტკიცებდა, რომ შეურაცხყოფას აყენებენ.

ბრიტნის სპირსის საქმესთან დაკავშირებული შემდეგი პროცესი 19 იანვარს ჩატარდება.