საზოგადოებრივი მაუწყებლის დირექტორი, ვასილ მაღლაფერიძე არ ადასტურებს ინფორმაციას, რომ პარლამენტის პირდაპირი ტრანსლაციები შეიზღუდება. როგორც მაღლაფერიძე On.ge-სთან საუბარში ამბობს, იყო შემთხვევები, როდესაც კადრები მაუწყებლის ლოგოს გარეშე გადიოდა. მისივე თქმით, შეწყდება ასეთი პრაქტიკა და ამას ბრძანების გამოცემა არ სჭირდება:

"არავითარი ცვლილება არ არის ლოგოსთან დაკავშირებით. უბრალოდ ხანდახან ხდებოდა ხოლმე, რომ ლოგოს გარეშე გადიოდა, ანუ არასწორად ხდებოდა ჩვენი პროდუქციის გამოყენება. ეს დამკვიდრებულია, სამწუხაროდ, ასეთი პრაქტიკა არსებობს. უბრალოდ პირად ლაპარაკში გავაფრთხილეთ, რომ ასეთი პრაქტიკა აღარ იქნება. ამას არც ბრძანება უნდა და არც არაფერი. ამას შემდეგ რაღაც განცხადებები მოყვა, რომელთაც არაფერი კავშირი არ აქვთ სიმართლესთან," - ამბობს მაღლაფერიძე.

ინფორმაცია ცვლილებასთან დაკავშირებით თავდაპირველად ევროპული საქართველოს წევრმა, ოთო კახიძემ გააჟღერა. კახიძის თქმით, ვასილ მაღლაფერიძის ახალი ბრძანებით, კერძო ტელევიზიებს მხოლოდ ის ლაივ სტრიმი გადაეცემათ, რომელიც საზოგადოებრივი მაუწყებლის მეორე არხის ეთერში გავა. იმ შემთხვევაში კი როდესაც სხვადასხვა კომიტეტების სხდომები პარალელურ რეჟიმში მიმდინარეობს, კერძო მაუწყებლებს იმ სტრიმზე წვდომა არ ექნებათ, რომელიც მეორე არხის ეთერში არ გადის.